IBM prevé un futuro inmediato de banca dixital agás no que se refire a contratacións

A multinacional informática e electrónica IBM vén de publicar un novo informe sobre servizos de banca no que se confirma o que xa se supuña: que os clientes iremos cada vez menos ás oficinais sucursais e que empregaremos máis os servizos nas redes (banca en liña) e no móbil. Este proceso, semellante e complementario ao da Administración Electrónica ou ao da computación empresarial na nube (que comparten o obxectivo de tirar proveito das redes para facer xestións máis doadas e inmediatas), percíbese xa nun bo feixe de operacións que podemos facer coas entidades financeiras (atención o cliente, comunicación, compra de entradas) aínda que polo de agora non chega a apartados como o de contratación.
No informe, con todo, non se fai referencia á cantidade de traballadores dos bancos que poderían ficar na rúa se as entidades non fan ben o seu proceso de dixitalización (que non ten porqué significar, cómpre recordalo, deshumanización).
O estudo A nova visión da banca multicanle de IBM realizouse a partir dunha enquisa a 2.000 consumidores españois co obxectivo de entender mellor os seus costumes de uso actual e axudar ás entidades financeiras a desenvolver visión de banca multicanle. Máis polo miúdo, o informe desvela que máis da cuarta parte dos consumidores sostén que o día de mañá empregará a banca en liña máis que agora, o 13,8% prevé utilizar máis a banca móbil, o 11,8% os caixeiros e o 6,8% as oficinas.
Respecto á aposta polas redes sociais e os centros de atención ao cliente (os chamados call centers), só un 4,9% e un 3,1%, respectivamente, cre que empregará estas canles máis que agora.
Malia este panorama vindeiro e esta tendencia dos clientes a apostar polo autoservizo, non se prevé un proceso de dixitalación integral. Deste xeito, máis da metade dos usuarios afirma que seguirá preferindo as oficinas para contratar produtos bancarios, ficando os restantes servizos ao abeiro das canles en liña. Para IBM, isto último débese a que a xente valora cada vez máis a comodidade que achegan as canles de autoservizo, xa que evitan ringleiras de espera e desprazamentos.