IBM lanza un produto para facilitar a conversión das firmas en empresas cognitivas
xoves, 5 de novembro do 2015
A multinacional
informática IBM vén de presentar un produto integrador destinado a
axudar ás organizacións a converterse en empresas cognitivas,
ou sexa, empresas que na súa relación co coñecemento vaian máis
alá dunha simple xestión e interpretación: que estean capacitadas
para enxergar e entender todo tipo de datos en todo o seu alcance e
aplicar, ante retos, solucións intelixentes inmediatas. O produto en
cuestión chámase API Harmony é xunta un conxunto de solucións e
servizos API (Interface de Programación de Aplicacións) baseados na
nube. En palabras de IBM, API Harmony achega “unha experiencia de
desenvolvemento única”. E faino empregando tecnolóxicas
cognitivas como o mapeado e o gráfico intelixentes. A idea é axudar
aos desenvolvedores “a adiantarse ás súas necesidades cando se
enfronten á creación de novas aplicacións”.
Segundo fai saber IBM nun
comunicado, as API constitúen un mercado en espallamento que moverá
en 2018 a cifra de 2.200 billóns de dólares, experimentando a cifra
de empresas que contan con elas un medre do 150% durante os vindeiros
dous ou tres anos. “Trátase de compoñentes de software que
funcionan coma un pegamento tecnolóxico, integrando información e
lóxica empresarial para conectar sistemas de múltiples empresas
mediante aplicacións en calquera dispositivo a través da nube”,
explica a multinacional, que engade que a aposta de IBM ofrecendo
novos servizos para que as compañías saquen meirande proveito da
economía das API “pon os alicerces para que as contornas na nube
se xunten, achegando unha integración consistente con independencia
da infraestrutura cloud que se empregue”.
Nun plano máis concreto,
IBM salienta que entre as solucións acabadas de presentar cómpre
destacar a solución de estratexia (os consultores de IBM que forman
parte da nova era cognitiva farán uso dun modelo de adopción para
identificar oportunidades clave e avaliar o estado de madurez dos
clientes no seu camiño cara á economía das API), a solución de
tecnoloxía (IBM incorporou “por vez primeira” capacidades de
aprendizaxe automática na súa tecnoloxía API Harmony para axudar
aos desenvolvedores a usar tecnoloxía de procura intelixente e así
atopar APIs con rapidez e facilidade”) e a solución de ecosistema
(a multinacional lembra que colabora con Linux Foundation e as
principais organizacións de estándares abertos para ofrecer unha
plataforma de creación, xestión e integración de APIs abertas).
“”