HappyCar confirma o imparábel medre das reservas de aluguer de coche vía móbil

A firma HappyCar (comparador de prezos de automóbiles de uso temporal) vén de realizar un informe sobre o uso das novas tecnoloxías para reservar coches de aluguer nun feixe de países europeos. Segundo informa a empresa, a taxa de emprego de dispositivos intelixentes e tabletas por parte dos condutores españois para realizar a devandita operación é arestora do 30%. Este dato, sinala HappyCar, “certifica a importancia que están a adquirir os trebellos móbiles no ámbito do comercio electrónico”. Segundo engaden fontes do comparador europeo, o informe serve para confirmar, dende o específico ao xeral, até que punto están a mudar os hábitos dos internautas españois (hábitos cada vez máis envorcados no dixital).
Para a investigación, a firma analizou o comportamento de usuarios do cinco países europeos nos que opera (Alemaña, Holanda, Francia, España e Italia) reservando coches de aluguer a través da súa páxina web e da súa aplicación en iOS no período comprendido entre xuño e agosto de 2015, tempada alta no devandito sector. A través deste seguimento, sinala a empresa, puidéronse observar tendencias de consumo en liña no mercado dos coches de aluguer e do sector turístico, en xeral. Nun plano concreto, descubriuse que as reservas realizadas a través de teléfonos móbiles representan unha media de entre o 15 e o 20% das reservas totais mensuais en todos os países estudados. No caso español, unha media do 19,02% dos usuarios decantáronse por facer a súa reserva a través do seu móbil entre os meses de xuño e xullo. Ao abeiro deste seguimento achouse que mentres que en xuño apenas un 14,75% destes usuarios reservaban co seu dispositivo intelixente, esta cifra aumentou até o 20,58% en xullo e até o 21,73% en agosto. Segundo confirma HappyCar, as cifras amosan neste senso unha tendencia clara: cada vez máis españois deciden alugar un coche de aluguer a través do seu móbil.
Pola súa banda, o comportamento das reservas a través de tabletas “non é tan optimista”. Segundo se fai saber, “apenas unha media do 9,15% dos usuarios españois reservaron a través destes dispositivos no verán, e mesmo pódese observar un lixeiro descenso desde xuño, cando o 10,35% dos clientes reservaron o seu coche coa súa tableta, até agosto, mes no que a devandita porcentaxe baixou até o 8,18%”.
No informe tamén se indica que malia o aumento das reservas feitas con teléfonos móbiles, “o computador de sobremesa segue a ser o dispositivo número un para reservar coches de aluguer”. Porén, trátase dunha opción á baixa. No que corresponde aos usuarios españois, o descenso “é claro”, explica HappyCar, que engade que o 74,91% dos usuarios elixiu o computador en xuño para facer o seu reserva; cifra que descende ao 70,09% en agosto. Deste xeito, o descenso en dous meses é de catro puntos porcentuais.