Gradiant sinala o potencial dos seus traballos e experiencia para incrementar a seguridade viaria
mércores, 13 de novembro do 2013
A seguridade viaria é e
seguirá a ser un tema candente. E máis se temos en conta que os
sinistros de tráfico, segundo a Organización Mundial da Saúde,
seguen
a figurar no top 10 das principais causas de morte do mundo (na
nosa terra está entre as primeiras causas, xunto con cancro). Por
estas razóns, os investimentos en seguridade medraron moito nos
últimos anos. Durante 2011, destináronse a esta cuestión até 214
millóns de euros en España, aínda que logo coa crise as cifras e
esforzos decreceron dende as administracións. Porén, a actividade
das empresas e os centros de investigación increméntase con cada
ano que pasa. Un exemplo disto é o que se fai dende o centro galego
Gradiant, no que consideran que a introdución de novas tecnoloxías
no ámbito da seguridade viaria suporá un gran avance, xa que
ademais de mellorar a prevención e asistencia, axudará a reducir os
custos que estas supoñen cada ano.
O centro galego lémbranos
estes días, nun
artigo do investigador Javier Sánchez Rois, que os sistemas
baseados en visión artificial e procesado de imaxe, nos
que Gradiant leva traballando dende hai tempo, “supoñen un
claro exemplo de como as novas tecnoloxías marcarán o
desenvolvemento de sistemas intelixentes na era das cidades
intelixentes”. Os casos reais de aplicación destes sistemas poden
ser moitos e variados. Por exemplo: no camiño de monotorizar e
seguir o estado anímico dos condutores, detectando estados de fatiga
que afectan directamente á seguridade na estrada.
Segundo informa Gradiant,
o centro conta coa experiencia e coñecemento precisos para trasladar
estas novas tecnoloxías ao eido da protección nos vehículos.
Experiencia e coñecemento adquiridos tras a participación en
diferentes proxectos de investigación e innovación. Por exemplo no
eido das interfaces home-máquina (HCI), no que Gradiant realizou
sistemas de análise facial que poderían aplicarse para a devandita
monitorización de condutores. Lembrar tamén que o centro galego
desenvolveu plataformas de vídeo vixilancia que inclúen sistemas de
detección de eventos anómalos ou medida do volume de tráfico,
permitindo o control de zonas urbanas e interurbanas en tempo real.
“Grazas a estas e outras capacidades, Gradiant pode levar a
innovación á seguridade das nosas estradas e cidades para facelas
así máis seguras”, comenta no seu artigo Sánchez Rois.