Gradiant reúne este venres nunha xornada a tódolos sectores implicados no pulo á eSaúde
xoves, 23 de xaneiro do 2014
Os desenvolvedores e
usuarios de recursos tecnolóxicos dirixidos aos ámbitos da medicina
e a asistencia teñen unha cita practicamente ineludíbel este venres
24 en Vigo. A cita en cuestión vén da man do centro galego
Gradiant, que vai celebrar ese
día unha Xornada de Transferencia Tecnolóxica sobre eSaúde, na
sede de CITEXVI a partir das 9.00 horas. O evento, como dixemos os
días pasados, contará con representantes da Comisión Europea, das
distintas administracións implicadas, das principais empresas do
ámbito TIC aplicado á saúde do Estado e dos principais centros
hospitalarios de Galicia e de España. Por certo que Gradiant
publicou estes días o programa definitivo en
formato PDF.
Durante a xornada,
profesionais de Gradiant (centro de investigación emprazado en Vigo
e centrado en boa medida nas telecomunicacións e na transferencia
tecnolóxica) amosarán as capacidades dos seus últimos proxectos de
investigación, e tamén explicarán como e en que medida as
tecnoloxías da información poden contribuír ao eido da saúde.
Entre os profesionais de Gradiant presentes na xornada estarán
Helena Fernández, directora técnica da Área de eSaúde, e Fernando
Jiménez, director xerente do centro, que será o encargado de abrir
oficialmente a actividade. A continuación será a quenda de Manuel
Varela Rey, director da Axencia Galega de Innovación (GAIN), que
falará de O reto do envellecemento activo no marco da RIS3.
Máis tarde, intervirá Sonia Martínez Arca, directora xeral de
Innovación e Xestión de Saúde Pública da Xunta, xirando o seu
relatorio arredor de Os vindeiros retos da innovación sanitaria.
A seguinte relatora en intervir será Francisca García,
representante de eSaúde da Comisión Europea, baixo o seguinte
epígrafe: Oportunidades de financiamento europeo á investigación
e á innovación en saúde.
Amais destes
representantes das nosas administracións, un importante panel de
expertos provenientes da industria e do sector socio-sanitario
debaterán sobre o futuro da I+D+i no devandito ámbito, ademais de
sobre o papel dos centros de investigación para apoiar ás empresas
no logro dos seus obxectivos. Segundo informa Gradiant, participarán
expertos de empresas tan recoñecidas como IBM, Indra, Coremain,
Everis e Sivsa.
A xornada propíciase en
parte pola ampla experiencia de Gradiant neste eido das novas
tecnoloxías aplicadas á medicina ou ao sanitario, e en parte tamén
polas importantes posibilidades de medre e busca de novos mercados
que se abren para as nosas empresas centradas en cuestións como a
teleasistencia ou o desenvolvemento de tecnoloxías e dispositivos
que contribúan a mellorar a nosa calidade de vida. De feito, segundo
nos lembran dende Gradiant, a Comisión Europea ten advertido en
repetidas ocasións que é precisa unha aposta pola eSaúde para
garantir unha asistencia sanitaria de calidade, hoxe e sobre todo de
face ao futuro. “Sen ela”, recordan os investigadores do centro
galego, “o futuro dos sistemas sanitarios públicos podería verse
comprometido, debido entre outros factores ao envellecemento da
poboación e ao aumento de pacientes crónicos”. De feito, estas
recomendacións están moi presentes no programa que marcará as
liñas de acción en I+D en Europa de aquí ao ano 2020.
A continuación incluímos
o programa definitivo da xornada.
9.00 Recepción aos
asistentes
10.00 Apertura a cargo de
Fernando Jiménez, director xerente de Gradiant.
10.10 Relatorio O reto
do envellecemento activo no marco da RIS3, a
cargo de Manuel Varela Rey,
director da Axencia Galega de Innovación (GAIN).
10.30 Relatorio A
innovación como motor do cambio do sistema sanitario público de
Galicia, a cargo de Sonia Martínez Arca, directora xeral de
Innovación e Xestión de Saúde Pública da Xunta.
10.50 Relatorio Horizonte
2020, oportunidades de financiamento europeo para a I+D en eSaúde.
A cargo de Francisca García, representante de eSaúde da Comisión
Europea.
11.20 Intervención IBM a
cargo de Pere Albert Labal, arquitecto IT da Iniciativa de Innovación
de IBM.
11.40 Presentación da
área de eSaúde de Gradiant. A cargo de Helena Fernández, directora
técnica da Área de eSaúde de Gradiant.
12.00 Pausa.
12.45 Intervención da
empresa Indra. A cargo de Fernando Silió, director de Mensor, área
de Consultoría Sanitaria en Indra.
13.05 Intervención de
empresa: Tunstall. A cargo de Rafael Llarena, director de Área de
Telemedicina de Tunstall.
13.25. Panel de expertos.
Tema: O futuro da I+D no eido da eSaúde. Participan Alfonso Varela
(xefe de Cardioloxía do CHUS), José Manuel Vázquez (director de
Organización e Xestión Clínica do CHUAC), Carlos Peña
(coordinador de Investigación e Innovación da Fundación Biomédica
Galicia Sur), Luis A. Álvarez (director xeral de Coremain), Alberto
Borrego (director de Everis), José Outón (director Área de
Sanidade de Sivsa), Germán Rodríguez (director médico do Hospital
Fátima) e Ángel Alberich-Bayarre (director corporativo de Enxeñaría
Biomédica do Grupo Hospitalario Quirón).