Gradiant participa en voos experimentais con UAVs no aeródromo de Rozas
luns, 13 de xuño do 2016
O Aeródromo de Rozas
(Lugo) acolle estes días os
segundos voos experimentais de validación en UAVs (Vehículos Aéreos
non Tripulados, polas súas siglas en inglés Unnamed Aerial
Vehicles) da tecnoloxía de comunicación por satélite
desenvolvido ao abeiro de TÁCTICA, proxecto dirixido a mellorar
os sistemas actuais de comunicación vía satélite dende estacións
móbiles no ámbito civil, transmitindo información en menos tempo e
con meirandes taxas de fiabilidade na comunicación e velocidade na
transmisión.
TÁCTICA,
como lembraremos, rematou a súa andaina en decembro 2015 e veu da
man do Centro AtlantTIC da Universidade de Vigo, contando coa
participación do Centro Tecnolóxico Gradiant e de SCR (Sistemas de
Control Remoto) do grupo Everis Aeroespacial e Defensa.
Segundo nos contan dende
Gradiant, durante este tres últimos días probáronse melloras nun
innovador sistema de comunicacións embarcado nun UAV e a súa
conexión en tempo real cun satélite, co fin de validar o traballo
de I+D+i realizado dentro do marco do proxecto. “A súa principal
innovación”, explica o centro tecnolóxico, “reside en ser un
sistema de comunicacións satélite con capacidade de adaptación,
capaz de variar a taxa de información transmitida en función das
características da canle de comunicación”.
AtlantTIC, ao fío do
devandito, desenvolveu algoritmos para acadar a adaptación da
ligazón que precisamente permite adecuar as transmisións ás
condicións da canle. Gradiant, pola súa banda, conseguiu deseñar e
implementar o software e hardware, tanto o embarcado no dron de
probas, como no equipamento da estación base no aeródromo. “Desta
maneira”, explican, “lógranse comunicacións máis fiábeis en
diferentes condicións de voo, auméntase a cantidade de datos, e a
súa velocidade de transmisión”.
O modelo de proba, de
feito, conseguiu comunicarse a través dun satélite norteamericano a
10.500 quilómetros de altura cunha base terrestre.
SCR puxo a disposición
das probas experimentais un UAV de medio alcance que permite voar
con payloads de 7 quilogramos en misións de até 5
horas de duración.
O proxecto TÁCTICA, que
contou co apoio do Ministerio de Economía e Competitividade (MINECO)
e do Fondo Europeo de Desenvolvemento Rexional (FEDER), expúxose
como un gran proxecto de I+D, con varias de liñas de investigación
que impulsaron o polo de xeración e transferencia de coñecemento
TIC creado en Galicia; e que permitiron xerar coñecemento
aplicado con resultados, en palabras dos impulsores da iniciativa,
“claramente transferíbeis á industria”. A través desta
colaboración en TÁCTICA, Gradiant consolidou a súa traxectoria e a
súa competencia tecnolóxica no sector das aeronaves non tripuladas,
e reforzou o seu modelo de transferencia tecnolóxica cara ás
empresas.
“O éxito das probas
realizadas abre un novo espectro de oportunidades no marco do sector
dos UAV”, engade o centro tecnolóxico galego acerca das
experiencias realizadas nas Rozas, cualificando este sector de
“industria que ha ir adquirindo peso en Galicia nos últimos tempos
e onde a Xunta de Galicia, a través da Axencia Galega de Innovación
(GAIN), apostou fortemente co seu Civil UAV Initiative para crear un
polo de desenvolvemento tecnolóxico-industrial, da man das empresas
Indra e Inaer, no ámbito dos sistemas aéreos non tripulados”.
Gradiant, como centro tecnolóxico TIC referencia en Galicia,
participará activamente desta iniciativa durante os vindeiros anos.