Gradiant e o Círculo de Empresarios xuntan innovación e cañas na cita deste martes: InnoBar
luns, 24 de marzo do 2014
Este martes ás 19.00
horas temos unha cita en Vigo coa innovación máis avanzada. Ou
sexa, con múltiples xeitos de abrirlle xanelas ao futuro ao noso
sistema investigador e produtivo. Falamos do encontro InnoBar,
unha actividade organizada por Gradiant
e o Círculo
de Empresarios de Galicia e que contará coa presenza de Fernando
Jiménez, xerente do centro tecnolóxico. Dáse a circunstancia de
que non só se falará de innovación, senón que tamén se fará
innovación. De feito, a propia feitura do encontro (que se
desenvolve coma unha mestura de networking, charla divulgativa
e sesión de cañas) é un xeito de arredarse do convencional.
Segundo nos conta
Gradiant, InnoBar é un instrumento para fuxir de clichés e
de ideas preconcibidas sobre este tipo de charlas e encontros
profesionais. De feito, din fontes do centro tecnolóxico, “algunhas
das ideas máis innovadoras e produtivas do noso tempo non saíron
dunha mesa de xuntas, senón da barra dun bar, o punto de encontro
perfecto despois dunha longa xornada na oficina”. E engade: “O
remate da xornada pode ser o intre ideal para aprender cousas
distintas que nos permiten acadar ese punto de desconexión e lecer
que nos resulta vital, aprender cousas que resultan máis
transcendentais e renovadoras do que nos imaxinamos”.
Como dixemos, a cita é a
partir das 19.00 horas na sede no Círculo, en García Barbón 62.