Gradiant afonda nas múltiples vantaxes da tecnoloxía Ultrawideband (UWD)
mércores, 5 de marzo do 2014
Gradiant, Centro
Tecnolóxico das Telecomunicacións de Galicia, segue a dar pasos no
seu obxectivo de aliñar a I+D universitaria coas demandas
empresariais centrándose en tres áreas de actividade: comunicacións
dixitais, información multimodal, redes e aplicacións. Emporiso, o
centro con sede en Vigo está de actualidade por
estar investigando os diferentes eidos de aplicación da tecnoloxía
Ultrawideband
(UWB
ou Banda
Ultra Larga,
en galego), especialmente aplicada no seu uso para o posicionamento
en interiores e para a detección de ritmo cardíaco e respiratorio
sen contacto; unha idea que pode ser aplicada á monitorización de
pacientes hospitalizados, diagnóstico de apnea do sono e mesmo ir á
procura a persoas atrapadas entre cascallos.
E a que nos referimos con ese
termo de Ultrawideband?
O UWD abrangue todo un conxunto de sistemas que empregan un ancho de
banda ou rango de frecuencias amplo, comparado co empregado
habitualmente en sistemas de comunicacións. Este elevado ancho de
banda permite transmitir datos a taxas moi altas, sen máis que usar
mecanismos de comunicacións análogos aos empregados polo resto de
sistemas. Porén, esta tecnoloxía é moito máis que iso, pois as
principais liñas de uso para esta tecnoloxía na actualidade
céntranse en aspectos que se afastan da mencionada capacidade de
transmisión.
Así, a UWB permite transmitir
pulsos illados de moi curta duración, e os devanditos pulsos poden
ser empregados para medir distancias con precisións notábeis.
Asemade, existen plataformas comerciais capaces de acadar precisións
de centímetros sobre alcances maiores a cen metros. Estas
capacidades, xunto cos desenvolvementos en electrónica dos últimos
anos, fan dela unha alternativa moi prometedora para a localización
en interiores, onde os sistemas de posicionamento por satélite como
o GPS resultan ineficaces. Amais, estes mesmos pulsos curtos poden
ser empregados para transmisión de datos a baixa ou media taxa a
distancias curtas, o que supón unha vantaxe adicional de cara ao
novidoso Internet das Cousas
e ás redes de sensores tradicionais, ao permitir o posicionamento
preciso e comunicacións nunha única tecnoloxía. Por outra banda,
os sistemas radar tamén poden beneficiarse desa resolución temporal
para captar detalles e obter información moi completa da contorna.
Máis aínda, as ondas electromagnéticas de baixa frecuencia son
quen de penetrar no chan, paredes de ladrillo ou xeo, polo que o uso
de Ultrawideband
sobre estas frecuencias permite interesantes aplicacións como a
“visión a través das paredes” cunha resolución centimétrica
ou seguimento do estado do asfalto, entre outras.