Google recomenda empregar chaves USB para protexer as nosas contas de usuario

As chaves USB ocupan pouco tamaño, polo que poden levarse sempre enriba

Cada vez temos máis incidencias relativas á seguridade informática que fai temer que os nosos contrasinais poidan ir parar a malas mans, de aí que as compañías recomenden empregar métodos de verificación en 2 pasos, de xeito que, por exemplo, podemos facer que, aparte do noso nome de usuario e contrasinal, empreguemos o noso móbil para reforzar a seguridade da nosa conta, facendo máis complicado o acceso indebido aos nosos datos e, para continuar a avanzar neste ámbito dende Google propoñen agora o uso nunha solución de seguridade aínda maior: o uso de dispositivos físicos USB.
A idea é que unha vez que nos identifiquemos nunha páxina web, unha chave USB física entre en funcionamento tras comprobarse que a comprobación de credenciais ten lugar nunha páxina web de Google, transmítese unha sinatura criptográfica que non pode ser suplantada. Para poder facer uso desta solución temos que empregar o navegador Chrome é unha chave USB que empregue o protocolo U2F da FIDO Alliance, que poden atoparse no mercado por prezos bastante axustados (uns 6 euros).
Este xeito de empregar a verificación en dous pasos non funciona só con Chrome e contas de Google, senón que tamén poden empregalos outros servizos web para contribuír á protección das nosas contas que opten por esta tecnoloxía que como grande vantaxe ten o non precisar de móbil e estaría destinada principalmente para o seu uso en ordenadores persoais. Polo momento precisa como mínimo a versión 38 de Google Chrome e funciona nos sistemas operativos Chrome OS, Windows, OS X e Linux.