Google Expeditions convídanos a explorar o mundo virtualmente

A aplicación Google Expeditions, que propoñía un interesante xeito de realizar viaxes virtuais valéndose de cascos de realidade virtual de baixo custo a través de experiencias guiadas por un guía (normalmente un profesor) que explicaba aos exploradores (alumnos) o que tiñan diante, facilitando así excursións virtuais ao Museo Nacional de Ciencias Naturais ou a realización de rutas para coñecer mellor a figura de Cervantes, está a renovarse para permitir que non sexa preciso contar cun guía humano para poder reproducir as máis de 600 xiras virtuais que inclúe.
A aplicación busca deste xeito achegarse a usos fóra das aulas, de xeito que poderemos explorar as localizacións rexistradas en 360 graos cun sistema de guía automática, o que pode incluso servir para que os escolares poidan realizar visitas guiadas no seu fogar a xeito de deberes, o que confían que sexa un xeito máis divertido de aprender as materias en base a narracións en lugares emblemáticos.
Aínda que a meirande parte dos contidos de Google Expeditions continúan a estar en inglés, a ferramenta resulta de grande utilidade dentro do contorno educativo. A súa funcionalidade de guía automática está xa a espallarse na súa versión para Android, tardando un pouco máis en chegar á aplicación para iOS.