Goberno e profesionais do sector dixital xuntan forzas para repensar FICOD
venres, 30 de novembro do 2012
O salón FICOD,
do que temos falado en Código Cero con motivo dos
seus compoñentes galegos e dos
milleiros de profesionais que mobiliza,
atópase arestora nunha encrucillada. En boa medida, pola lousa que
representa o seu formato: unha feitura anterior aos tempos das redes
sociais e do ensarillado actual, 2.0, do que a nova vida offline
colle unha chea de cousas emprestadas (que
cómpre aplicar tamén en FICOD). Co fin de
darlle unha volta á metodoloxía do salón madrileño de contidos
dixitais e conectalo máis
estreitamente aos
demais sectores produtivos (aos que pode achegar un gran potencial),
celebrouse este xoves a xornada
Repensando FICOD.
O secretario de Estado de
Telecomunicacións e para a Sociedade da Información, Víctor
Calvo-Sotelo, foi o encargado de inaugurala. E fíxoo lembrando a
importancia do sector para o Goberno central e salientando o crucial
dunha cita de refundamento como a devandita: “O futuro da feira
dependerá en gran medida da reflexión estratéxica desta
convocatoria”.
O debate dirixido polo director xeral
de Red.es, Borja Adsuara, tivo por obxecto definir unha nova
estratexia para este foro, coa participación de todos os axentes
involucrados no impulso dos contidos dixitais. Adsuara asegurou “que
FICOD será o que demande o propio sector, buscando sempre a
reutilización eficiente dos recursos públicos”. Neste senso,
profundou na necesidade de converter FICOD en foco e escaparate das
empresas españolas para a súa internacionalización. O máximo
responsábel de Red.es detallou algunha das pautas nas que se
traballa para o futuro do foro:
· A dixitalización como motor
necesario dos novos modelos de negocio ao transformar o contexto
empresarial de maneira definitiva.
· Unha nova estratexia orientada á
racionalización orzamentaria, ao aliñamento coas empresas, á
medición de resultados de á implicación coas asociacións
sectoriais.
Asemade, avogouse
por levar FICOD lonxe do seu espazo natural
(a outros eventos referenciais), apoiar programas de pulo a
emprendedores, facilitar a presenza de empresas españolas no
exterior e potenciar a páxina web www.ficod.es
como foco fundamental de transferencia de coñecemento.
No transcurso desta xornada, o
director do Observatorio Nacional das Telecomunicacións e da
Sociedade da Información (ONTSI), Pedro Martín, ofreceu detalles do
Informe Anual dos Contidos Dixitais en España 2011. Entre as
principais conclusións destacan:
- O negocio dixital supón o 52,8% da
facturación total do sector dos contidos en España.
- Por importancia económica, o sector
audiovisual é o que máis ingresos xerou, cun 43,6% do total.
- O investimento publicitario en liña
alcanzou os 899,2 millóns de euros sendo a única actividade das
analizadas que incrementa o seu volume de negocio até o 12,6%.