Gmail recupera a normalidade tras o borrado accidental do 0,02% das súas contas
martes, 1 de marzo do 2011
A pasada fin de
semana unhas 40.000 contas de correo electrónico de Google (menos do 0,02% do
total) atopáronse con que o único contido da súa bandexa de entrada era a
mensaxe de benvida ao servizo, pois foron
reiniciadas accidentalmente. Pero finalmente a
incidencia está a resolverse, aÃnda que o volume da mesma (e certos fallos
de software que precisaron de corrección) provocou que a restauración de copias
de seguridade das contas de usuario afectadas fose máis lenta do que era de
agardar, polo que os relativamente poucos afectados quedaron sen servizo
durante unhas 30 horas.
Dende Google xustifican a lentitude da restauración da información das contas
de Gmail explicando que as copias de seguridade almacénanse en unidades de
cinta, que non están en liña (para
maior seguridade) polo que transferir os seus datos de novo aos seus data centers é un proceso de horas de
duración. Tamén detallan que a eliminación da información das contas de correo
electrónico foi provocada por un erro de programación na última actualización
do software que xestiona os seus sistemas de almacenamento de datos, e que foi
cancelada ao detectarse o fallo.
