Gmail integra tradución automática de correos electrónicos
mércores, 20 de maio do 2009
Os usuarios do servizo de correo de Google, Gmail, poden activar unha das
novas funcionalidades dos Gmail Labs chamada Tradución de mensaxes, que permite
definir que as mensaxes recibidas en linguas distintas á configurada por
defecto pasen polo tradutor de Google (que incluso soporta o galego) de
xeito que os correos electrónicos estranxeiros amosarán a opción de traducilos
á nosa lingua, o que agradecerán os usuarios que non se defendan ben en inglés
(e outros idiomas).
As mensaxes de correo electrónico recibidas permanecerán almacenadas
no seu formato orixinal, de xeito que a tradución deberá forzarse cada vez
que as queiramos ler na nosa lingua, o que implica que tampouco poderemos
localizalos mediante busca polas palabras que vexamos na súa versión traducida.