Ganga! chega a Vilagarcía para impulsar o comercio local a través dos móbiles
martes, 20 de setembro do 2016
Os responsábeis da
aplicación galega Ganga! (unha ferramenta destinada a pór en
contacto aos clientes dunha localidade cos seus pequenos
comerciantes) veñen de anunciar a súa chegada a Vilagarcía. E
fanno con novidades, posto que o lanzamento na cidade arousá estase
a acompañar da posibilidade de descargar de balde a versión
avanzada da aplicación, Ganga Pro, que entre outras cousas permite
aos comerciantes subir as súas promocións. Esta tecnoloxía, como
lembraremos, foi desenvolvida pola firma compostelá eLaboro.
Ganga! foi lanzada nunha primeira fase en Santiago, A Coruña e
Pontevedra, co obxectivo de espallarse logo no resto de Galicia.
En palabras dos seus
desenvolvedores, “trátase da primeira plataforma de mcommerce
feita dende Galicia para o fomento do comercio polo miúdo, as
actividades dos profesionais autónomos e as microPEME da nosa
comunidade”. Con motivo da súa arribada a Arousa, engaden que
“Ganga abre acceso directo dende o noso dispositivo intelixente ao
comercio da nosa contorna dando visibilidade a produtos e servizos
con independencia da súa localización física, por iso é o
escaparate ideal para aqueles que non dispoñen dun local nas zonas
comerciais máis céntricas ou para dar a coñecer produtos
exclusivos ou artigos perecedoiros”. Entre as súas vantaxes figura
precisamente a de non ser un simple escaparate de produtos a bo
prezo. De feito, permite aos usuarios facer cousas como saber se
dispoñen na súa peixería de referencia dun produto difícil de
conseguir, ou decatarse de cando chegan as froitas da tempada á súa
froitería. “Ganga é quen de canalizar os intereses de compradores
e vendedores galegos e faios confluír nos smartphones”,
explican os responsábeis da ferramenta.
Como dixemos, a chegada
a Vilagarcía de Ganga estase a acompañar do lanzamento de Ganga
Pro, un lanzamento en promoción que permite (durante un tempo
limitado) aos usuarios empregar esta aplicación de balde
(descargala, darse de alta e subir contidos). Esta oferta será de
aplicación entre os comerciantes, pero tamén entre clientes e
empresarios.
Cifras a ter en
conta
Segundo explican os
creadores de Ganga, máis de 300 comercios déronse de alta só no
primeiro mes do lanzamento da ferramenta móbil. Ademais, grazas á
publicación de promocións en Ganga por parte dos nosos empresarios
e comerciantes, “vendéronse 50 móbiles en tan só media hora en
Santiago, 25 tabletas en 25 minutos en Pontevedra, preto dunha
tonelada de lagostinos nun establecemento da Praza de Abastos
compostelá e unha froitería santiaguesa despachou máis de 1.000
quilos de patacas nun só día”. Para estes comerciantes, engaden,
“a aplicación non só serviu para vender estes produtos ou
converter en efectivo materiais que en stock, senón para darse a
coñecer e para que, unha vez no establecemento, o cliente poida ver
outros produtos e promocións”.