Galileo Masters rastrexa na nosa terra as propostas máis innovadoras para aplicacións de navegación por satélite
martes, 16 de maio do 2017
A
Universidade de Vigo vén de informar da apertura do prazo para
presentarmos candidaturas na actual edición do certame European
Satellite Navigation Competition (ESNC) ou Galileo Masters, un
concurso impulsado por varias entidades europeas (a Axencia Espacial
Europea, ESA, o Centro Aeroespacial Alemán e o Ministerio alemán de
Transporte e Infraestruturas Dixitais) en colaboración con socios
locais (no caso galego, a Universidade de Vigo e a Zona Franca). O
obxectivo? Ante todo, procurar as mellores ideas para o
desenvolvemento de aplicacións de navegación por satélite. O
premio ao gañador galego obterá un ano de incubación nun dos
parques empresariais do Consorcio da Zona Franca de Vigo, incluíndo
asesoramento de expertos, formación e adestramento.
Ademais
do premio rexional, os participantes poden optar a seis galardóns
internacionais e repartiranse máis de 1 millón de euros en premios.
Amais, o gañador viaxará de balde á cerimonia internacional de
entrega de galardóns, que terá lugar en outubro.
Na
fase galega do
ESNC, a Axencia Espacial Europea conta como socios co Consorcio
da Zona Franca de Vigo, a Universidade de Vigo, Campus do Mar e o
centro de investigación AtlantTIC. O obxectivo, como dixemos, é
buscar os mellores servizos, produtos e innovacións que tiren
proveito da navegación por satélite na vida cotiá.
Nas
dúas primeiras edicións galegas do concurso os gañadores foron
estudantes e investigadores da EE de Telecomunicación. Francisco
Javier Díaz-Otero, docente e investigador do Departamento de Teoría
do Sinal e Comunicacións da Universidade de Vigo e coordinador
galego do concurso lembra que poden presentarse ideas de negocio con
independencia do estado de desenvolvemento no que se atope o proxecto
ou servizo, “xa que algún dos premios están orientados a
favorecer e facer agromar ideas embrionarias para convertelas en
realidades empresariais”.
O 30 de xuño péchase o prazo
de presentación de candidaturas. A xuntanza internacional de
avaliación celebrarase en setembro e a cerimonia de entrega de
premios no mes de outubro.
Segundo
informa a UVigo, o ano pasado Galicia confirmouse como a sexta
participante local con máis proxectos presentados ao certame, un
total de 26, xermolados nas universidades, centros tecnolóxicos e
empresas, resultando gañador un proxecto da EE de Telecomunicación
da Universidade de Vigo.
Amais
do devandito millón de euros en premios, a Universidade salienta que
arredor do concurso existe unha rede europea de 250 socios académicos
e empresariais e máis de 10.000 comunicacións enviadas a medios de
comunicación, empresas e axentes relacionados coa navegación vía
satélite en toda Europa. Dito doutra maneira: grazas ao certame,
multiplícanse as posibilidades de que os proxectos gañadores sexan
vistos por todo o tecido investigador, investidor e empresarial
europeo. De feito, a visibilidade e promoción dos proxectos que se
impoñan fan o 60% das ideas locais gañadoras acaben incubando con
éxito a súa idea e converténdose nunha pequena ou mediana empresa
viábel e rendíbel. De feito, o catedrático de Teoría da Sinal e
das Comunicacións Manuel García e o investigador do Grupo Sistemas
de Radio Daniel Gómez, gañadores da edición de 2016, xa están en
contacto con empresas interesadas no desenvolvemento e
comercialización da súa idea, un radar pasivo biestático que axuda
a aterrar drones en circunstancias desfavorábeis.