Galiciencia 2013 entregou os seus premios
martes, 26 de novembro do 2013
Galiciencia,
contando como contaba cunha nutrida representación dos nosos
investigadores e científicos novos, deu para moito. Ou sexa, para
unha listaxe case interminábel de ideas e proxectos reais de
recursos, sistemas e aparellos para facernos a vida e o traballo un
pouco máis doados, os hábitos máis saudábeis e o xeito de
movernos dun lado a outro máis seguro. Neste último eido temático
inseriuse precisamente a achega gañadora da feira Galiciencia,
organizada
pola Tecnópole en Ourense, tal e como sinalamos os días pasados
dende Código Cero. Falamos dun sistema antikamikazes para
autoestradas, que se proclamou gañador absoluto do certame, no que
competiron 50 equipos de estudantes de toda a nosa xeografía e tamén
de Barcelona.
Este
proxecto foi o vencedor na categoría de segundo
ciclo da ESO e gañador absoluto por impoñerse en puntuación aos
dos outros dous equipos gañadores nas categorías de primeiro
ciclo da ESO e Bacharelato. Xosé Lois Chorén e Unai Ansedes, do IES
Xoán Montes (Lugo), presentaron un proxecto de seguridade viaria
que foi destacado de xeito unánime polo xurado.
Os premios
foron entregados polo conselleiro de Economía e Industria, Francisco
Conde, e polo director da Axencia Galega de Innovación, Manuel
Varela. Conde felicitou a todos os participantes e animounos a
“seguir pensando en clave de ciencia, innovación e creatividade”
para ser a seguinte xeración de emprendedores de Galicia.
O sistema
de alerta de acceso en contrasentido en autoestrada é unha proposta
que, segundo os seus creadores, “podería ser
aplicada a
toda a rede viaria cun custo moi accesíbel”.
O obxectivo é avisar aos condutores que accedan por sentido
contrario a unha autoestrada por erro, despiste ou deficiente
sinalización vertical. Basicamente consiste no repintado das liñas
brancas actualmente existentes no firme con pintura fotoluminiscente
e en relevo (para producir sonoridade). A nova pintura fará que as
liñas véxanse
de cor branco no sentido correcto da marcha, pero se se entrara en
dirección contraria veríase de cor vermella xa desde o mesmo punto
de intersección desde a estrada de acceso.
Segundo
informa a Tecnópole, os
gañadores na categoría de 1º ciclo da ESO, Marieta Orol e Carlos
López, do Centro Educativo Galén, tamén de Lugo, amosaron
un completo proxecto
que chamou
a atención dos visitantes pola súa excelente presentación. Os
alumnos realizaron unha investigación do seu contorno para
identificar e recoller plantas das que poder extraer aceites
esenciais co obxectivo de elaborar un perfume ecolóxico que todos os
que pasaron pola Galiciencia puideron ulir. O proxecto inclúe a
planificación económica de custos e prezo, a parte artística de
elaboración dunha etiqueta, a parte creativa e lingüística da
campaña de marketing
e publicidade, a
parte tecnolóxica de materiais e ferramentas, e todo isto cun
obxectivo solidario como é a colaboración cunha ONG.
Na
categoría de Bacharelato a gañadora foi Alba Fernández, do IES
Julio Prieto Nespereira (Ourense), co seu respaldo intelixente.
Segundo engade a
Tecnópole, “durante
estes tres días foron moitos os que sentaron no seu prototipo de
cadeira para comprobar como, ante unha postura non
axeitada das costas,
acendíanse
os pilotos luminosos de alerta”. Segundo a inventora, o seguinte
paso é incorporar unha alerta de son. Dado que o seu proxecto
diríxese
sobre todo a centros escolares, a súa idea é que o son veña
nunha frecuencia moi baixa que os adultos non perciben, pero si os
máis novos.
Cada un
dos membros dos tres equipos gañadores levou un smartphone
que no caso do
primeiro premio absoluto complétase
co financiamento da viaxe á Exporecerca, a feira científica de
ámbito estatal que se celebra en Cataluña.
Coa
clausura da Galiciencia dase por rematada a Semana da Ciencia en
España, na que a FECYT destacou entre as actividades de referencia a
feira celebrada na Tecnópole. A Fundación foi cofinanciadora do
evento xunto coa Consellería de Economía e Industria.