GaliciaTIC pon de manifesto a capacidade do noso sector en materia de emprego e negocio
martes, 14 de outubro do 2014
Hoxe celébrase en Santiago, na Cidade da Cultura (edificio CINC),
a edición número XII de GaliciaTIC,
foro de exposición e debate sobre a nosa industria
tecnolóxico-dixital e as solucións e servizos dos que fai gala
arestora. O
encontro foi inaugurado por Mar Pereira, directora da Axencia para a
Modernización Tecnolóxica de Galicia,
AMTEGA, quen aproveitou a cita cos profesionais do noso sector
tecnolóxico-dixital para salientar a súa capacidade demostrada para
levar o sector ao máis alto e manter o emprego por riba dos 15.000
traballadores desde 2010 e cun volume de negocio de 2.290 millóns de
euros en 2013. O evento GaliciaTIC vén da man da UVigo, o COETG e
INEO.
Pereira, para ilustrar
o devandito, trouxo a colación os últimos datos do observatorio
OSIMGA, nos que se constata “o esforzo que está a realizar o
sector no eido da innovación”. Ao fío disto, recordou que en 2013
máis do 30% das empresas TIC galegas desenvolveu actividades de
I+D+i, e destas, o 65,2% obtivo resultados comercializábeis.
“Ademais”, engadiu, “o sector TIC galego incrementou no último
ano en máis de 4 puntos a cooperación en actividades de innovación
con empresas da Unión Europea e en máis de dous puntos a
colaboración neste eido con compañías de Estados Unidos”.
A directora da AMTEGA
valorou tamén o capital humano do noso eido produtivo vencellado á
información e ao dixital, “con máis de 4.000 alumnos matriculados
en carreiras TIC no sistema universitario galego, tres centros
tecnolóxicos de prestixio e 37 grupos de investigación”. A todo
isto, engadiu, “súmase o compromiso da Xunta, que desde 2009
apostou pola tecnoloxía como elemento estratéxico de crecemento
poñendo en marcha a Axenda Dixital 2014.gal, cun investimento de
preto de 1.100 millóns de euros”.
Volvendo
ao propio evento GaliciaTIC, dicir que nesta edición 2014 estase a
facer especial fincapé nas cuestións do Big
Data, da analítica
intelixente, da Internet das Cousas, da Computación na Nube e do
Negocio Social. Alén disto, abránguense temas como os aspectos de
internacionalización (que tanto afectan ao tecido de empresas TIC de
Galicia) e mesas sectoriais temáticas sobre tecnoloxías aplicadas a
todo tipo de empresas, como corresponde ao carácter horizontal das
TIC.
Cómpre informar que este ano están a pasar polo evento -entre outros profesionais- investigadores do CITIC, que xa amosou o seu apoio á
xornada noutras ocasións, e que participará desta volta na Mesa
Temática 3 (16.00 horas), coordinada por Philips e baixo o título
Connected
Ligthing.
A mesa tratará sobre sistemas innovadores de comunicación.
En
representación do CITIC asiste Luís Castedo Ribas, responsábel da
Área Tecnolóxica de Comunicacións Sen Fíos do CITIC. As súas
liñas de traballo céntranse no procesado de sinal para
comunicacións sen fíos e no prototipado de equipos terminais de
comunicacións.
Asemade, tamén participan en GaliciaTIC Santiago
Julián, director de Desenvolvemento de Iluminación Urbana para
España e Portugal en Philips Ibérica; Pablo Vázquez, responsábel
de Innovación e Sistemas de Información no Concello da Coruña; e
Paula Uría, xefa de Área de Xestión e Coordinación coas
Administracións Públicas en IDEGA, Xunta de Galicia.