GaliciaTIC celébrase este ano en Compostela, o día 24

Público nunha das anteriores edicións de GaliciaTIC

Logo de dez edicións celebradas, GaliciaTIC xa ten data para unha nova quenda de avance tecnolóxico no eido tecnolóxico-dixital. A cita no calendario deste ano está fixada para o vindeiro xoves 24 de outubro e o lugar será o compostelán Centro de Innovación Cultural (CINC) da Cidade da Cultura. Neste día descubriranse as tendencias máis actuais nas tecnoloxías TIC, desde o punto de vista da oferta global, ou sexa, aquelas que sexan de interese para o sector empresarial e profesional e melloren a experiencia do cliente.
Para iso proporanse unha serie de temas de gran actualidade que poidan atraer a atención do mundo profesional empresarial e académico de Galicia arredor das TIC. Como novidade nesta edición, GaliciaTIC -que vén da man unha vez máis do profesor Miguel Merino- desexa completar a visión que se ten sobre os mercados tecnolóxico-dixitais estendéndoa ao ámbito internacional, en especial cara a países emerxentes, como oportunidade para o desenvolvemento tecnolóxico en produtos e servizos baseados en TIC e de negocio para as empresas do sector en Galicia. GaliciaTIC encamíñase desde o comezo cara a demanda que se poida satisfacer desde os activos de coñecemento e tecnolóxicos das empresas que participan, e buscando novas oportunidades de desenvolvemento empresarial. Desta volta, contarase co coñecemento de expertos e empresas fortemente internacionalizadas, que demanden tecnoloxías que teñan un gran potencial de desenvolvemento para as empresas que participen. Para máis información, cómpre visitar a web de GaliciaTIC.