Galicia e Portugal potencian as renovables na Rede
venres, 6 de maio do 2011
Dende
sempre, os galegos temos con Portugal un apego moi especial, ligado
inevitablemente a aquela época na que ambas rexións eramos unha mesma, cos
mesmos intereses e os mesmos obxectivos.
Hoxe,
esta relación de irmandadade latente no eido empresarial, fíxose máis visible
que nunca grazas á Rede, onde foi lanzada unha web para dar acollida ás PEME
do sector das enerxías renovables da Eurorrexión Galicia-Norte de Portugal.
Energytic.eu é o nome que leva este espazo
virtual de entendemento galego-portugués, que por certo, foi lanzado dende
a sede dunha das entidades que máis aposta pola innovación tecnolóxica no noso
país: a Tecnópole.
Ata San
Cibrao das Viñas, en Ourense, achegáronse esta mesma mañá máis de 50 empresas e
entidades de toda Galicia, para informarse de primeira man, das vantaxes que
ofrece esta plataforma ao servizo das enerxías renovables.
A
iniciativa enmárcase no proxecto europeo ER-INNOVA, e está orientada a mellorar
a competitividade das empresas do sector das enerxías renovables da Eurorrexión,
mediante ferramentas tecnolóxicas.
Porén
moitos dos empresarios e empresarias que pasarán a formar parte do espazo virtual,
aínda non teñen os coñecementos suficientes para botar man desta tecnoloxía,
polo que a Tecnópole celebrou unha xornada técnica na que, entre outras cousas,
se explicou o funcionamento da web.
Foi unha
xornada eminentemente práctica, que constituíu o “punto de encontro” inicial destas empresas e entidades, e que achegou información
de utilidade das distintas ferramentas que hai dispoñibles na web, tales como
un mercado virtual de bens e servizos, e un completo sistema de facturación
electrónica que inclúe a custodia dos documentos emitidos para que estén
dispoñibles en todo momento.
A posta
en marcha do portal compleméntase coa outra liña principal de actuación do
proxecto: o deseño e implantación de ferramentas para a xestión interna das
pequenas e medianas empresas, a través de aplicacións de escritorio, entre as
que destaca un sistema de planificación de recursos empresariais (ERP)
especificamente deseñado para estas entidades.
Esta
ferramenta xa está a ser implantada nas PEME participantes na fase piloto, e
xa está dispoñible para a súa descarga online
na web oficial do evento: Er-Innova.com.