Galegolab pon a primeira pedra do que será unha guía en liña de negocios a prol do galego
luns, 27 de decembro do 2010
- A Libraría Couceiro de Santiago, un bo exempo de local normalizador da nosa lingua
Cómpre relembralo sempre: o galego é un valor.
Isto que é aplicable á comunicación na nosa vida diaria tamén se pode estender
ao eido empresarial e económico. Do mesmo xeito que nos gusta saber se nun
negocio determinado nos van atender ben, tamén é de xustiza coñecer se nos van
falar na nosa lingua. Que logo merquemos ou non a cousa ou o servizo que se nos
ofrece, éche outro cantar. Galegolab.org
quere avanzar neste punto: encher o baleiro que existe a día de hoxe no eido
das guías (telefónicas e de negocios) no que a informar do emprego do galego se
refire. A iniciativa, que como todas as que abrollan de Galegolab se dirixe a
introducir o noso idioma onde non se emprega ren, require da posta en marcha
dunha páxina web de tipo participativa. Este sitio, que para o seu impulso e
mantemento precisaría de webmasters dispostos
“a traballar pola causa”, sería unha
plataforma aberta as 24 horas a calquera suxestión e achega de información
sobre todas aquelas empresas que usan o galego.
Estas serán de todo tipo: empresas en xeral,
prensa, restaurantes, bares, tascas, pubs, editoriais, tendas, lugares de lecer
(parques, salas de cinema, salas de teatro, salas de xogos, asociacións ou
centros culturais), organizacións, colectivos, negocios varios, hoteis, moteis,
etc. Todo terá cabida, polo tanto, nesta guía branca dos negocios en galego. Segundo
informan dende Galegolab, non terán cabida na escolma as empresas que só usen a
lingua a niveis de base, só no nome da firma ou do servizo ou con aqueles
clientes que así o soliciten, directa ou indirectamente. Non, o que se busca é
un emprego da lingua normal e normalizado.”Procuramos
locais que empreguen a nosa lingua tanto no nivel escrito como no falado e onde
o galego teña incidencia”, sinalan.
Os datos que seguindo estes criterios se recaden, subiranse á web para
logo abrir un proceso de votación e debate para que os internautas coñezan os
locais expostos e dean a súa opinión sobre o pendurado en liña. Aqueles locais que presenten unha votación
negativa e cuxa información non se adapte á realidade serán eliminados da web.