Galaxia vai pór en marcha unha innovadora plataforma para produtos dixitais
mércores, 6 de agosto do 2014
O noso sector do libro
busca o seu camiño. Case con toda seguridade e agora que o panorama
de axudas á edición en galego aseméllase cada vez máis a unha
paisaxe erma, non queda outra que renovarse. A Rede pode ser unha
resposta? Se cadra si, pero só a medias. Hoxe soubemos que unha das
nosas editoriais máis senlleiras e antigas, Galaxia,
está a piques de iniciar unha nova andaina. Será unha nova etapa
con algo máis ca un ollo posto na Rede. En certa maneira, semella
que Galaxia vai pór enriba da Rede boa parte do seu peso. Os
seus responsábeis teñen en mente lanzar unha plataforma para
produtos dixitais. Dende alí venderíanse cousas como libros
electrónicos.
Isto formaría parte
dunha renovación moito máis fonda. Para comezar, a xunta de
accionistas da editorial quere duplicar o capital social da empresa
en dous anos. Ou sexa, chegar aos 600.000 euros (partindo dunha base
de 247.000). Para acadalo, Galaxia abriu un proceso de recadación
que xa se saldou, polo de agora, coa obtención de 270.000 euros.
De xeito paralelo e
complementario, a axenda de renovación da empresa abrangue a posta
en marcha da devandita plataforma dixital. Será un recurso en liña
para a promoción e distribución de produtos culturais (Galaxia
Dixital). O denominador común dos produtos será a cultura galega.
Venderanse libros e papel e facilitaranse ao máximo as descargas de
libros electrónicos. Segundo conta Galicia Confidencial reflectindo
informacións de Galaxia, esta plataforma “poderá colaborar ou
mesmo instalarse noutras plataformas xa operativas”. A intención é
que nos primeiros meses do ano vindeiro se presenten 200 títulos
para descarga dixital, todos extraidos do catálogo histórico de
Galaxia.