Galaxia publicará a obra de Casares en edición dixital
xoves, 8 de marzo do 2012
Con motivo do décimo cabodano do inesperado pasamento de Carlos Casares, que se
celebra mañá día 9 de marzo, a Editorial Galaxia vai lanzar á Rede a obra dixitalizada
deste autor galego, do que din “os guiou
durante tantos anos”, e que ademais de escritor, “foi compañeiro e amigo”.
Farao no marco da iniciativa Dez
anos con Carlos Casares, que entre outras cousas, inclúe o lanzamento dun
blog de seu no que escritores, estudosos, críticos e lectores poidan envorcar,
a través das distintas entradas, a súa visión particular sobre a vida e obra do
autor de Ilustrísima.
O blog, ao que se poderá acceder directamente dende unha ligazón
específica disposta na web da
editorial, irase actualizando cada dúas semanas con artigos de “diversa
profundidade”, e estará activo soamente ata finais deste ano.
Deste xeito, os internautas seareiros da boa lectura que ademais
gustan dos trebellos máis modernos do mercado para gozar dunha nova experiencia,
poderán acceder á obra de Casares en formato dixital, así como achegar os seus
comentarios no blog habilitado a estes efectos na Rede.