Fujitsu celebra este xoves no CESGA os 20 anos da instalación do seu primeiro supercomputador europeo
mércores, 5 de xuño do 2013
A compañía tecnolóxica
xaponesa Fujitsu, unha das
grandes firmas históricas en fabricación de equipamento TIC,
celebra este xoves día 6 en Santiago os 20 anos de instalación do
primeiro supercomputador da súa marca en Europa, nun acto que se vai
a desenvolver na sede do CESGA (Centro
de Supercomputación de Galicia), no Campus Vida de Compostela.
Segundo contan fontes do centro galego, o supercomputador VP2400 foi
no intre da súa posta en marcha en 1993 o máis potente de España e
o número 146 do mundo na lista Top500.org, así como “o corazón
do equipamento do Centro de Supercomputación de Galicia nos seus
primeiros anos”.
Dende aquela e até os
nosos días, o devandito equipamento de Fujitsu achega servizo de
cálculo avanzado á Xunta de Galicia, á comunidade investigadora do
tres universidades galegas -Santiago, A Coruña e Vigo- e á do
Consello Superior de Investigacións Científicas (CSIC). En
conmemoración da efeméride, a división española da multinacional
xaponesa organiza este xoves unha xornada tecnolóxica. A cita,
informa a firma, “insírese tamén na celebración do 40 aniversario da compañía en España
e, igualmente, do 400 aniversario de
relacións hispano-xaponesas”. Neste acto,
engaden fontes do CESGA, está prevista a participación de moitas
das persoas que entón promoveron, organizaron, puxeron en marcha e
utilizaron nos seus traballos o Centro de Supercomputación de
Galicia. O acto deste xoves comeza ás 12.00 coa benvida do
presidente de CESGA e director da Axencia Galega de Innovación,
Manuel Varela. A continuación o director de CESGA, Javier García
Tobío, explicará a evolución do Centro, e lembrará as
actividades e aos protagonistas dos primeiros anos, moitos dos cales
asistirán a este evento.