Ferrol instalará tres dispositivos de xestión electrónica coa Administración local
xoves, 12 de maio do 2022
O
Concello de
Ferrol vai instalar no municipio catro dispositivos de xestión
electrónica coa Administración local, tres na zona urbana e un
no ámbito rural. A medida foi anunciada polo concelleiro responsábel
do Centro de Recursos Informáticos e Organización Interna, Julián
Reina, quen deu conta dos detalles do proxecto, co-financiábel polo
fondo europeo FEDER ao abeiro da EDUSI Ría de Ferrol, Cidade 2020.
O
edil, quen referiuse a estes dispositivos como “caixeiros
electrónicos”, explicou que o que se pretende é “facilitar ao
conxunto da poboación de Ferrol o desenvolvemento das xestións
administrativas dun xeito electrónico co Concello, sobre todo a
aqueles que non dispoñen de medios electrónicos nos seus fogares,
sen limitación de horarios e sen esperar colas”.
Con
este proxecto “pretendemos avanzar na implantación en Ferrol dunha
Administración Electrónica plena”, dixo, engadindo que o Concello
está a desenvolver nos últimos anos “un continuo proceso de
ampliación dos servizos electrónicos ofrecidos tanto á cidadanía
como ao persoal que integra a Administración local”. É o caso,
engadiu, das xestións que se poden realizar a través da sede
electrónica. Co fin de proseguir neste labor, a de “lograr unha
administración máis eficaz, eficiente e preto ao cidadán”,
crearanse “novas canles de comunicación que permitirán aos
usuarios interactuar coa Administración local dun xeito máis
sinxelo e áxil”. Segundo apuntou, “esta iniciativa vai
contribuír á transformación de Ferrol nunha cidade máis
intelixente”.
A
instalación destes dispositivos na rúa “vai mellorar a
accesibilidade dos trámites á poboación ferrolá ao tempo que se
fomenta a transparencia e o desenvolvemento da Sociedade da
Información promovendo a realización de trámites electrónicos coa
Administración local”. Deste modo, apuntou o concelleiro,
“aumentará o número de usuarios que facen uso da
eAdministración”.
Reina
explicou que na actualidade o Concello está a traballar no pregos
que definirán a instalación dos novos dispositivos, que está
previsto que entren en funcionamento antes de decembro de 2023.