Ferrol amosará aos seus empresarios as posibilidades das TIC para o turismo
martes, 14 de xuño do 2016
Ferrol
quere darse a coñecer nas redes. Logo
do Blog Trip do que falamos onte en Código Cero (no que
participaron blogueiros de todo o ámbito estatal para entraren en
contacto cos reclamos turísticos do concello e da súa contorna),
agora o Goberno local vén de dar a coñecer a vindeira edición (a
segunda) do Foro de Turismo e Márketing, Fortumark. A
iniciativa foi presentada polo concelleiro de Turismo, Bruno Díaz,
quen explicou que se vai celebrar do 20 ao 22 de xuño e que vai
converter a cidade no “epicentro da mercadotecnia aplicada ao
turismo”. O encontro é froito do convenio Plan de
Competitividade Turística 2015 asinado entre a Deputación
Provincial da Coruña e o Concello de Ferrol.
O
concelleiro de Turismo, Bruno Díaz, informou que o evento formativo
diríxese sobre todo a empresarios do sector turístico e do comercio
de Ferrol e
comarcas, así como a asociacións empresariais da zona, que poderán
participar de balde. “Forturmark”, dixo, “ten como fin amosar
as innovacións e
boas prácticas de mercadotecnia e comunicación que xa desenvolven
as empresas de gran envergadura”. Amais, quere visualizar estes
achados e instrumentos perante os empresarios locais co obxectivo de
que lles tiren cumprido proveito, “adaptándoos ás características
de cadanseu negocio ao menor custo posible ou a custo 0, grazas ás
tecnoloxías”.
A
cita será no Parador de Ferrol. Do día 20 ao 22, en horario de
tarde, haberá relatorios
e cursos con actividades de interacción cos participantes. Os días
21 e 22, en horario de mañá, desenvolveranse actividades de
consultoría
e formacións individualizadas para analizar a presenza das empresas
locais en Google e mellorala a través da súa xeolocalización e nas
redes sociais, así como propostas para elaborar un plan de mellora.
Participarán
Isaac Vidal (co seu obradoiro-conferencia sobre Inbound Márketing,
explicando como atraer, converter, pechar e lograr a fidelidade do
cliente en liña e introducindo aos participantes na metodoloxía
Inbound de maneira moi sinxela e clara), Gersón Beltrán (impartindo
o curso O
teu negocio social, local e móbil,
a través do cal explicará a importancia da xeración de contidos
online
para
a promoción de negocios e destinos, amosando tamén como xerar
contido local e como comunicalo, medindo o seu impacto) ou o ferrolán
Luís Fraga, que será o encargado de pór o punto e final ao evento
co seu relatorio Media
Training,
unha sesión teórica e práctica para introducirnos no mundo dos
medios de comunicación.