FEUGA organiza un seminario sobre o uso eficiente de Excel

A Fundación Empresa-Universidade Galega (FEUGA) organiza os vindeiros días 3 e 4 de febreiro un seminario práctico de mellora da xestión empresarial a través do manexo dunha das ferramentas de ofimática máis extendida e empregada polos profesionais das empresas: a folla de cálculo.
O obxectivo da devandita fundación é incrementar o aproveitamento desta ferramenta xa que, segundo afirman os seus responsables, “non supera nin o 10 por cento do seu verdadeiro potencial”.
Baixo o título, Excel Bussines Solutions: Aplicacións avanzadas de Excel para a xestión empresarial, o seminario permitiralle aos asistentes que aprendan a desenvolver modelos de presupostos, cadros de mando, informes de venda, análises de ratios, estimacións de contas de resultados… ao tempo que se instruirán no deseño de solucións eficientes baseadas no modelo entrada-saída de datos.
O curso vai dirixido a directivos, xerentes e responsables técnicos nas áreas de marketing, finanzas, comercial e recursos humanos das empresas galegas e impartirase na sede da fundación FEUGA en Santiago de Compostela.
A data límite para realizar a inscripción, que se formaliza na web oficial ou a través do teléfono 981 534 180, remata o vindeiro 28 de xaneiro.