FEUGA móstranos nun curso como liderar procesos de transformación empresarial
mércores, 27 de abril do 2022
FEUGA
vai ofrecer esta primavera un curso webinario moi indicado
para facer voar a nosa empresa no camiño da excelencia, a
transformación e a competitividade: un curso que pon o foco en como
sacar o mellor do noso equipo profesional á hora de afrontar
calquera tipo de proxecto. O
curso Liderado para o crecemento e xestión do cambio
desenvolverase os días 25, 30 e 31 de maio, e máis o 1 de xuño.
Serán 12 horas de contidos, a desenvolver en horario de 9.30 a 12.30
horas.
Segundo
informa a fundación a respecto dos porqués desta proposta
formativa, a xestión do cambio é unha tarefa primordial de toda
persoa directiva e líder empresarial, para quen resulta xa
imprescindíbel, e máis nestes tempos de profundos cambios, como
levar a cabo unha transformación empresarial de éxito.
Na
actividade mostrarásenos como superar os principais atrancos que se
opoñen ao espírito transformador: barreiras externas (que se
refiren ao contexto da empresa) e barreiras internas (que engloban as
políticas, procedementos, a cultura da empresa ou as propias persoas
que poden ter temor ou resistencia ao cambio).
“Con
este curso”, explican dende FEUGA, “conseguiremos identificar que
técnicas e ferramentas son clave para executar con eficacia os
proxectos nos que estamos mergullados e cales son os aceleradores do
cambio que debemos implementar e como facelo”.
A
actividade formativa está dirixida a persoas directivas;
responsábeis de proxectos, áreas ou departamentos; mandos
intermedios; responsábeis de negocio; profesionais interesados en
mellorar a súa produtividade, xestionar o cambio e o seu crecemento
persoal; e profesionais cuxo cometido sexa xestionar o talento e
potencial dos seus equipos.
A
persoa encargada de impartir os contidos será Conxi Pérez Andreu,
experta en transformación na organización: combina a medición e
xestión do cambio coa aplicación de metodoloxías de transformación
rápida. Co-fundadora de RollDBox Games, e de In Movement. Ten unha
dilatada experiencia en posicións de dirección de Tecnoloxías da
Información (TI), impulsou e implantou iniciativas tanto no ámbito
xestión, como de produción, R&D, vendas ou mercadotecnia en
empresas do sector farmacéutico, enerxías renovábeis,
industria-metal ou educación.