FEUGA móstranos como ser máis competitivos botando man da cadea de bloques
mércores, 23 de marzo do 2022
FEUGA
vai organizar os días vindeiros un curso moi acaído para aquelas
persoas que queiran mergullarse nos novos formatos que adquirirán as
actividades empresariais. O
curso Blockchain e estratexia: como xerar vantaxes competitivas
celebrarase os días 19, 21, 26 e 28 de abril. Serán oito horas
de contidos a desenvolver en horario de mañá, de 9.30 a 11.30
horas.
Afondarase
nas posibilidades de negocio da tecnoloxía coñecida como cadea de
bloques (blockchain),
que é, en palabras de FEUGA, moito máis que criptomoedas: “A súa
aparición, de feito, posibilita a eclosión de novos modelos de
negocio e a redefinición dos existentes, pudendo xerar vantaxes
competitivas cunha mellora da eficacia e a eficiencia dos procesos
das organizacións”, explican dende a entidade organizadora.
A
persoa encargada de impartir os contidos será Antonio Rodríguez
Furones, conselleiro independente e conferenciante con máis de dúas
décadas como directivo e cunha traxectoria profesional ligada á
consultoría estratéxica e de operacións (Abantia Consulting,
Deloitte), á dirección de empresas de servizos (Augas de Valencia)
e ás tecnolóxicas (director xeral e conselleiro delegado do grupo
Tecopy).