FEUGA mergúllanos en abril nas vantaxes da metodoloxía de xestión de resultados que usa Google
venres, 11 de marzo do 2022
Este
mes de abril, os días 4, 5 e 6, FEUGA vai organizar unha xornada
destinada a achandar o terreo das empresas e profesionais de cara a
conseguir o meirande impacto posíbel cos seus proxectos
tecnolóxicos. Trátase do webinar OKRs:
descubre a metodoloxía de xestión de resultados que usa Google (PDF). Serán nove horas de formación a impartir en horario de
mañá, de 9.30 a 12.30 horas. Nesta actividade formativa axudarase
ás organizacións a tirar proveito da metodoloxía OKR (Objective
and Key Results) que traduzan a súa visión e estratexia nun
conxunto de obxectivos e establezan un proceso propio para revisalos
e medir logros.
Segundo
informa FEUGA, a metodoloxía OKR permite sincronizar os obxectivos e
resultados da empresa: “O uso de OKR facilita o establecemento
dunhas pautas claras para definir os obxectivos a alcanzar dunha
forma sinxela e colaborativa, desde todas as perspectivas e incluíndo
a todos os membros da organización. Tamén posibilita que se
identifiquen os resultados clave, é dicir, que é aquilo que hai que
medir e lograr para alcanzar o obxectivo”. FEUGA tamén explica que
os procedementos OKR popularizáronse grazas a que grandes empresas
os aplicaron, como é o caso de Google.
O
seminario será impartido por Ángel Águeda Barrero, que conta con
máis de 30 anos de experiencia en desenvolvemento de software e
implementación de solucións de negocio. Traballou para Microsoft,
ING, Siebel e Informática El Corte Inglés, entre outras empresas,
en Arxentina, España, Francia, Italia e Suíza. Actualmente é
formador e consultor independente en xestión de proxectos e director
executivo (CEO) de EvergreenPM.com. Amais, é enxeñeiro técnico en
Sistemas de Información Empresarial pola Universidade Pontificia de
Comillsa (ICAI) e conta cun MBA especializado en Información e
Comunicacións pola Universidade Politécnica de Madrid (UPM).