Estudantes do Campus de Pontevedra traballarán para optimizar o uso das redes sociais en Atresmedia
venres, 13 de febreiro do 2015
O grupo audiovisual
Atresmedia quere sacarlle
punta á súa comunicación nas redes sociais. Para logralo, contará
coas propostas de estudantes de varios centros académicos do ámbito
estatal, incluído
un grupo de seis alumnos e alumnas da Facultade de Ciencias Sociais e
da Comunicación do Campus de Pontevedra, baixo a coordinación
do profesor Alberto Dafonte, no marco do Proxecto
Mañá do devandito grupo audiovisual. Con esta
iniciativa, a compañía busca coñecer de primeira man o que faría
a xente nova “se estiveran no lugar dos responsábeis do grupo”.
Esta é a mensaxe que vén de lanzar o presidente de Atresmedia Cine,
Mikel Lejarza, que este xoves xuntouse cos participantes galegos de
Proxecto Mañá. Nela hai estudantes de varias universidades
estatais, e a partir da convocatoria actual (e en virtude do convenio
asinado entre Lejarza e o reitor da UVigo Salustiano Mato), tamén
dunha universidade galega.
Segundo fixo saber a
decana do centro, Emma Torres, foi o propio grupo audiovisual o que
seleccionou á facultade para tomar parte na quinta edición deste
proxecto docente de innovación, ao que tamén concorren as
universidades de Málaga e Navarra, a Pompeu Fabra de Barcelona e a
Juan Carlos I de Madrid.
As alumnas de
Publicidade e Relacións Públicas Jennifer Álvarez, Susana Basoa e
Zoe Calvo e os estudantes de Comunicación Audiovisual Sara Varela,
Miguel Grandío e Bernabé Carrillo integran o equipo que, co apoio
dos profesores Alberto Dafonte, Silvia García Mirón e Xabier Rolán,
representará á Universidade neste Proyecto Mañana. Segundo
informa a UVigo, ao igual que ao resto de participantes,
corresponderalles analizar a comunicación que a través das redes
sociais realizan un programa de televisión e outro de radio do grupo
para, a partires de aí, deseñar un proxecto que a finais de xuño
ou comezos de xullo presentarán diante do equipo directivo do grupo
na súa sede central, en San Sebastián de los Reyes. No seu caso,
corresponderalles estudar El Intermedio, de La Sexta, e
Radioestadio, de Onda Cero, que lles servirán como casos
concretos cos que afondar no impacto das redes sociais na difusión
dos contidos audiovisuais. Segundo se recolle no convenio asinado, o
grupo premiará aos dous equipos que presenten os proxectos que
consideren máis innovadores con cinco bolsas trimestrais para
realizar practicas na súa área multimedia.