Estudantes de Psicopedagoxía deseñan blogs de orientación para o alumnado da ESO
xoves, 17 de xuño do 2010
Margarita Valcarce é unha profesora da Universidade
de Vigo que un bo día decidiu aplicar as novas tecnoloxías ao ensino e mellorar
as súas clases de Orientación Profesional,
materia que imparte no 5º curso de Psicopedagoxía da Facultade de Ciencias da
Educación en Ourense; porén non se limitou a levar as TIC á aula senón que foi
máis alá e propúxose ensinarlle aos seus alumnos a botar man das ferramentas
tecnolóxicas e Internet para mellorar as súas clases o día de mañá, cando se
convirtan en futuros formadores.
A experiencia
resultante foi, para os seus alumnos e alumnas, “innovadora, gratificante e moi positiva” posto que a docente
animounos a deseñar blogs con información de utilidade para o estudantado da
ESO abordando deste xeito o proceso de orientación no ensino secundario
prestando asesoramento e axuda na toma de decisións vocacionais.
En palabras de Valcarce, o resultado foi
“moi positivo”, posto que en dúas
clases prácticas (4 horas de traballo na aula) os preto de 60 alumnos da
materia, divididos en grupos, foron quen de deseñar e elaborar 9 blogs que
fican agora na Rede agardando ser de utilidade para todos aqueles alumnos e
alumnas da ESO que precisen dunha orientación na súa traxectoria académica e
profesional.
O primeiro paso do traballo foi abordar a
parte teórica da materia para deseñar e estruturar despois o contido do blog, e
trasladar a información resultante ao Blogger,
unha ferramenta de publicación de blogs de balde. O resultado son os 9 blogs
que se atopan xa na Internet con información que recolle, principalmente, temas
de utilidade para o estudantado da ESO, como as saídas académicas e laborais ás
que poden acceder ou orientación, guías e outros recursos web que lles poden
ser de utilidade, en resumo, e segundo palabras de Valcarce, “toda a información necesaria para poder
facer unha toma de decisións cualificada de cara ao seu futuro profesional”.
Entre os blogs que xurdiron desta
iniciativa destacan Y yo que
quiero ser, Todos
Orienta2, Orientación Académica y
Profesional, ou Orientación
Profesional que lle ofrece á comunidade internauta a posibilidade de participar
no seu contido e contribuír así á súa mellora.