Estudantes da Fonsagrada achegan un vídeo de homenaxe a Celso Emilio gravado cos seus móbiles
martes, 8 de maio do 2012
Achégase o 17 de maio e conflúen no noso
panorama cultural dúas celebracións que, lonxe de excluírse, compleméntanse á
perfección. Por unha banda as conmemoracións arredor da figura homenaxeada nas
Letras Galegas, Valentín Paz Andrade, e, pola outra, as de Celso Emilio
Ferreiro, que este ano 2012 tería celebrado os seus cen anos de vida. As
accións vinculadas a Celso Emilio, moitas e variadas (a exposición
interactiva, o concurso de
fotografía no móbil), seguen adiante. A máis recente é a desenvolvida por
un centro escolar de gran experiencia no uso das redes a prol da nosa cultura:
o IES Fontem Albei de Fonsagrada.
Trátase
dun vídeo, moi ben realizado, ao que se lle deu corpo a través do uso
intensivo dunha ferramenta comunicativa e creativa que a rapazada do devandito
IES coñece ben: o móbil. A obra, feita en colaboración co profesorado do
centro, representa un achegamento da mocidade da Fonsagrada á obra do autor de Longa Noite de Pedra, na súa vertente de
poeta e co gallo do centenario do seu nacemento. As obras recitadas foron extraídas
dos volumes existentes na biblioteca escolar e o traballo, informan os seus
responsábeis, ten como fío condutor un poema publicado na revista Vieiros, no
seu número 2 (en 1965): Contribución ao
plan de desenvolvemento económico. Na achega do alumnado da Fonsagrada vánselle
engadido versos ceibos, segundo as escollas dos participantes na lectura
colectiva.
Como dixemos, o IES Fontem Albei
non é precisamente un centro acabado de chegar ao universo da comunicación e a
creación ligada ás novas tecnoloxías. O centro, que conta cunha completa aula
virtual dende a que se imparten todo tipo de materias (bioloxía, xeografía e
historia, matemáticas, física e química, filosofía, tecnoloxía etc), foi entre
outras cousas responsábel de A imaxinación
ao poder, lipdub que veu da
man do Grupo de Traballo da Biblioteca do devandito IES e que se inseriu no seu
programa de Formación de Usuarios. Consistiu nun xeito de integrar as TIC no
seu día a día e serviulles, contan, para “lograr
a implicación da comunidade educativa nun proxecto común e fomentar a
participación, e o bo ambiente, tan necesario, entre todos e todas”.