Este venres 25 celébrase na Toxa a Noite das Telecomunicacións de Galicia
xoves, 24 de setembro do 2015
Este mes de setembro, o día 25 de setembro,
celébrase no Gran Hotel da Toxa a
Noite das Telecomunicacións de Galicia (edición XX), unha
velada organizada polo Colexio Oficial e a Asociación de Enxeñeiros
de Telecomunicación de Galicia (COETG e AETG) destinada a celebrar e
reivindicar o papel das novas tecnoloxías (e dos profesionais
galegos das novas tecnoloxías) no desenvolvemento económico e
social da nosa terra. A cita dará acubillo á entrega oficial dos
Premios Galicia das Telecomunicacións e da Sociedade da Información
2015, uns galardóns cos que se quere visualizar o traballo ben feito
en materia de impulso TIC, tanto no ámbito privado como no público.
A gala será dirixida pola presentadora Silvia Jato e contará co
complemento musical do grupo DGT. Ademais, contará coa presenza do
presidente do Goberno Galego, Alberto Núñez Feijóo. O lema da
cita: Un mundo conectado.
A velada comezará as 20.00 horas cunha sesión de
traballo en rede, que se prolongará até o inicio da gala, en cuxo
transcurso actuará o grupo musical DGT. Antes de comezar a cea, ás
22.45 horas, entregaranse os sete premios do Colexio Oficial e a
Asociación de Enxeñeiros de Telecomunicación de Galicia. Con estes
galardóns, os seus promotores quixeron convocar, un ano máis, á
totalidade dos profesionais, investigadores, empresas e entidades do
ámbito TIC galego. Estes
recoñecementos, en palabras do colexio e a asociación, constitúen
“unha excelente plataforma para a promoción e proxección das
empresas e profesionais galegos e para os produtos e servizos que se
están a desenvolver no sector TIC na nosa terra”.
Por
galardóns e obxectivos, lembrar que o Premio
Gerardo García Campos á mellor iniciativa empresarial TIC,
o Premio
Gradiant á Mellor Tese Doutoral aplicada ao sector TIC e
o Premio
Ineo ao produto ou servizo TIC orientado ao Internet das cousas 2015,
teñen por obxecto “potenciar o noso sector salientando aquelas
empresas, desenvolvementos e investigacións aplicadas con maior
posibilidade de crecemento e proxección”. Convocouse tamén o
Premio
ao Mellor Proxecto TIC con Beneficios Sociais 2015,
en colaboración coa Axencia para a Modernización Tecnolóxica de
Galicia (AMTEGA), destinado a recoñecer os mellores proxectos no
ámbito das Tecnoloxías da Información e a Comunicación (TIC) que
contribúan e acheguen beneficios á sociedade. Engadir, a maiores, o
Premio
Acuntia para
as nosas firmas máis envorcadas no desenvolvemento de equipamentos
TIC intelixentes e os galardóns honoríficos Premio
Socio de Honra
e Premio
Enxeñeiro do Ano.
O programa da gala
A gala discorrerá segundo o programa que figura a
continuación:
19,45 h. Chegada dos patrocinadores. Traslado ao
photocall onde posan para os redactores gráficos dos medios de
comunicación.
19,55 h. Chegada dos
galardoados. Traslado ao photocall onde posan para os
redactores gráficos
dos medios de
comunicación
20,00 h. Networking
e cóctel de benvida no salón Aqua
21, 25 h. Chegada do
presidente da Xunta de Galicia
21,30 h. Traslado da zona
cóctel (Salón Aqua) a zona cea (Salón Principal). Foto de
familia para os medios de comunicación do presidente da Xunta cos
galardoados, patrocinadores, autoridades e xunta de goberno do
Colexio e da Asociación de Enxeñeiros de Telecomunicación de
Galicia
21,40 h. Comezo da gala
21.40 h. Presentación a
cargo de Silvia Jato
21.44 h. Proxección do
vídeo Un mundo conectado
21.47 h. Intervención do
decano do Colexio Oficial de Enxeñeiros de Telecomunicación de
Galicia.
22.00 h. Proxección dun
vídeo sobre os galardoados.
22.07 h. Entrega de
premios
22,20 h. Intervención do
Enxeñeiro do Ano 2015
22, 23 h. Intervención
do presidente da Xunta de Galicia
22, 34 h. Actuación do
Grupo DGT
22,37 h. Foto dos
galardoados coas autoridades, equipo directivo de Colexio e da
Asociación de Enxeñeiros de Comunicación de Galicia e
patrocinadores
22,45
h. Comezo da cea
Premios Galicia das Telecomunicacións e da Sociedade da Información 2015
O Premio Gerardo García Campos á
mellor iniciativa empresarial no sector TIC, outorgado polo Colexio
Oficial e a Asociación de Enxeñeiros de Telecomunicación de
Galicia, será para CO2 Smart Tech,
S.A., pola súa contribución á creación de emprego, o seu
espallamento internacional e a consolidación do seu volume de
negocio en amplos mercados. Como lembraremos, CO2 Smart Tech ten sede
en Oleiros e está especializada no desenvolvemento de sistemas
avanzados de control e xestión enerxética en liña. Por exemplo a
solución co2st-tem, unha ferramenta para o aforro e redución de
custes que axuda ás nosas empresas a iniciarse no control e xestión
de consumos de subministros de auga, electricidade e gas mediante
unha software de balde dispoñíbel e operábel na nube.
O Premio
Gradiant á mellor tese doutoral aplicada ao sector TIC 2015,
outorgado polo Colexio Oficial e a Asociación de Enxeñeiros de
Telecomunicación de Galicia, recaerá en Alberto
Rico Alvariño por Cognitive
and signal processing techniques for improved spectrum exploitation
in wireless communications. Como lembraremos, a tese
premiada expón técnicas que incrementan a eficiencia das redes sen
fíos e aporta solucións ao problema de reutilización do espectro
radioeléctrico, que ten un impacto fundamental no desenvolvemento
socioeconómico. Unha mostra da súa aplicabilidade é que os
resultados desenvolvidos foron licenciados para o uso da Axencia
Espacial Europea nos seus proxectos e estándares.
O Premio Ineo ao produto ou servizo TEIC
orientado á <Internet das Cousas, e
outorgado polo Colexio Oficial e a Asociación de Enxeñeiros de
Telecomunicación de Galicia, seralle concedido a Consultores
Tecnológicos Industriales de Galicia polo proxecto
Open Framework i3. V4.0, un sistema aberto para a extensión da
automatización de procesos a partes do sistema produtivo industrial
no que aínda non estaban implantados.
O
Premio ao Mellor Proxecto TIC con Beneficios Sociais
outorgado polo Colexio Oficial e a Asociación de Enxeñeiros de
Telecomunicación de Galicia, en colaboración coa AMTEGA, recaerá
nas Aulas
Interactivas para a estimulación cognitiva de alumnos coa síndrome
de Down e/ou discapacidade intelectual de Down Galicia. O
galardón recoñece o carácter innovador da idea, a súa viabilidade
e aplicabilidade pragmática e a súa contribución ao acceso ás TIC
e a inclusión dixital
O Premio Acuntia á empresa galega
que aposta polo desenvolvemento de infraestruturas intelixentes de
telecomunicacións, outorgado polo Colexio Oficial e a
Asociación de Enxeñeiros de Telecomunicación de Galicia,
concederáselle a RETEGAL, polo seu esforzo e dedicación “en
pechar a fenda dixital na nosa comunidade”. Segundo fixo saber o
xurado recentemente, “a compañía galardoada despregou unha
infraestrutura tecnolóxica que ofrece unha ampla cobertura, malia a
difícil orografía de Galicia, e permite prestar servizos que van
dende a radio e televisión ata o sistema Tetra de comunicación para
emerxencias”.
Polo
que respecta ao Premio Socio de Honra 2015 da
Asociación de Enxeñeiros de Telecomunicación de Galicia,
irá dar á Asociación PuntoGal
pola súa contribución á visibilidade, na Rede, da lingua, a
cultura e a identidade de Galicia. Como recordaremos, a entidade
recoñecida polos enxeñeiros de Telecomunicación galegos foi a
principal responsábel da consecución do noso dominio propio, o
.gal, o gran identificador en liña da nosa lingua e cultura e dos
seus cometidos (presentes e vindeiros) no progreso e a modernidade.
Por
último, o Premio Enxeñeiro do Ano 2015 do Colexio
Oficial e da Asociación de Enxeñeiros de Telecomunicación de
Galicia recaerá en José María Pousada Carballo “pola súa
contribución á difusión das Tecnoloxías da Información e a
Comunicación en Galicia, primeiro como director da Escola de
Enxeñaría de Telecomunicación da Universidade de Vigo, e
posteriormente como director do Centro Universitario de la Defensa,
na Escola Naval Militar de Marín”. Lembrar que Pousada Carballo
formou parte do Grupo de Tecnoloxías da Información da Universidade
de Vigo, dende o que xurdiron proxectos o “sistema antimóbiles”
deseñado en 1998 ou o prototipo, en 2002, dunha pulseira electrónica
para o control dos maltratadores. Asemade, Pousada contribuíu
naquela etapa a mudar a face das lonxas galegas, desenvolvendo as
primeiras feituras do mando que se emprega actualmente nas poxas
electrónicas.