Este mércores comeza a súa andaina oficial o Centro Yuzz Santiago
martes, 17 de marzo do 2015
O
Edificio Emprendia da Universidade
de Santiago acollerá a partir deste mércores 18 un Centro
Yuzz, un espazo de traballo, formación gratuíta e asesoramento
personalizado aos mozos e mozas seleccionados polo programa Yuzz
Jóvenes
con ideas
que impulsa o Centro Internacional Santander Emprendemento (CISE) coa
colaboración da Xunta de Galicia e a rede universitaria
RedEmprendia, e o mecenado de Banco Santander. O novo centro
inaugurarase este mércores 18 ás 17.00 horas coa presenza do reitor
Juan Viaño e a conselleira de Traballo e Benestar, Beatriz Mato.
No
acto tamén participarán o presidente de RedEmprendia, Senén Barro;
o delegado territorial de Banco Santander, Pablo Berdiel; e a
presidenta da Delegación de Secot da Coruña, unha das empresas que
apoian o proxecto, Áurea López. Intervirá ademais Victor Rivas Asorey, un dos mozos seleccionados polo programa o pasado ano co
seu proxecto E-Monte.
Segundo
informa a Universidade de Santiago, unha vez rematado o proceso de
formación e asesoramento nestes centros (máis de 40 en toda
España), os mellores de cada un deles viaxarán a Silicon Valley, en
palabras da USC “a meca mundial de innovación no ámbito das novas
tecnoloxías”, onde se lles brindará acceso a foros de
financiamento, asesoramento e contacto con investidores. Ademais, os
tres mellores proxectos de todo o país recibirán unha dotación
económica para axudarlles a poñer en marcha o seu negocio: 30.000 €
para o primeiro premio, 20.000 € para o segundo e 10.000 € para o
terceiro.