Escolasinfantis.net recibe preto de 75.000 visitas no último catrimestre
luns, 8 de febreiro do 2010
A páxina web de escolas infantís,
á que a Xunta lle está a dar pulo por ofrecer gran variedade e cantidade de
información actual sobre a rede de escolas infantís da Administración, leva
recibidas nos últimos catro meses, entre setembro de 2009 e finais de xaneiro
de 2010, preto de 75.000 visitas de usuarios diferentes, unha media de 700
visitas ao día.
A web, ademais de información de utilidade para o sector da educación e os
pais de alumnos do noso país, ofrece as últimas novas e información xeral sobre
listas de admitidos e períodos de matriculacións das escolas infantís galegas, así
como respostas ás dúbidas máis frecuentes dos usuarios.
Asemade, móstralle aos internautas os pasos que deben dar para crear o seu
propio blog e tal é o éxito deste servizo que xa están colgados na web un total
de 99 blogs de centros e 165 persoais.
Os contidos creados polos usuarios son diversas publicacións, que suman
4.500, e existen case 2.700 comentarios a estas publicacións. Esta cifra pon de
manifesto a rede que se crea cos blogs, xa que segundo diversos analistas por
cada comentario, unha publicación rexistra entre 30 e 50 lectores distintos. De
feito, o departamento autonómico destacou que as publicacións nos blogs “son moi seguidos polos pais e nais e polos
educadores dos centros"
No que se refire aos aspectos máis tecnolóxicos, a web conta con 100 GB de
tráfico mensual, cen veces máis que no ano 2007 e mostra 20.000 fotografías e
uns 370 vídeos, ademais de 80 cancións e 380 presentacións.
Con este proxecto, a Consellaría de Traballo e Benestar, que seguirá a
incluír novidades no portal, pretende “integrar
nas escolas infantís as novas tecnoloxías da información e comunicación”.
Entre as citadas novidades que dito departamento vai incluir destacan a promoción
do uso do comedor virtual por parte dos pais e nais co envío de receitas o
visitas aos menús escolares; o fomento da creación de novos recursos para os
nenos e nenas a través de ferramentas pedagóxicas que, ademais dos propios
educadores poidan utilizar os pais e nais; e a posta en marcha do ‘portfolio’, unha carpeta que incluirá os
traballos dos cativos para que os seus pais podan velos na web.