Escoitar as cores: unha realidade grazas a Vodafone Firsts e o músico Neil Harbisson
xoves, 13 de febreiro do 2014
Ser
o primeiro en facer algo e empregar a tecnoloxía móbil para levalo
a bo fin é o obxectivo de Vodafone
Firsts,
un programa de social media que -como xa dixemos en Código
Cero-
dá azos a todos aqueles que queiran converterse en protagonistas
dunha historia ideada por eles mesmos, iso si, coa condición de ser
algo nunca antes visto. É o caso de Neil
Harbisson,
británico de pai irlandés e nai española, un artista e músico que
naceu con acromatopsia, unha condición visual que lle impide
distinguir as cores. Emporiso, grazas a un ollo electrónico
(Eyeborg)
que leva na fronte pode interpretalos como frecuencias musicais, xa
que o dispositivo converte a luz en tons máis altos ou baixos que
percibe a través de vibracións até o seu oído interno.
Co
apoio de Vodafone, Harbisson compuxo unha obra musical baseada nas
cores do Palau da Música de Barcelona, e
ensinou a unha orquestra a “escoitar as cores” do mesmo
xeito que el o fai.
Así, por primeira vez no
mundo, os 42 membros do Coro Xuvenil do Palau da Música e un
cuarteto catalán de corda
cantaron e tocaron as notas baseadas nas cores que percibían a
través de tablets,
controlados á súa vez por Neil Harbisson. A través da tecnoloxía
móbil, Harbisson rexistrou as cores do Palau da Música nunha tablet
e compuxo a música nun dispositivo semellante. Dirixiu a orquestra
mediante a súa tablet,
que ía irradiando diferentes cores ao mesmo tempo aos membros do
coro e ao cuarteto de corda.
Cómpre
dicir que Harbisson tamén desenvolveu unha aplicación que permite
que a xente experimente a cor da mesma maneira que el. A aplicación
emprega a cámara do teléfono para analizar a cor e transformala nun
son que se reproduce a través do altofalante do smartphone.