Enxeñaría Informática despide 57 tituladas e titulados
venres, 8 de xuño do 2018
Este
7 de xuño o
alumnado de último curso do grao en Enxeñaría Informática, da
ESEI de Ourense, celebrou no Campus os seus actos de graduación.
En total, participaron no acto oficial (festexando o remate da súa
formación superior) 57 enxeñeiras e enxeñeiros informáticos, que
estiveron acompañados por membros da comunidade universitaria,
familiares e amizades. Para todos elas e eles, as autoridades
académicas tiveron palabras de recoñecemento polo “esforzo
realizado” e de bos desexos para o seu futuro profesional. Na
xornada de celebración (un algo máis tarde) tamén tivo parte
activa o alumnado de último curso do grao en Xeografía e Historia,
da Facultade de Historia (20 historiadoras e historiadores).
O
primeiro dos actos foi o da Escola Superior de Enxeñaría
Informática, que tivo lugar no Edificio Politécnico e que estivo
presidido por Virxilio Rodríguez, vicerreitor en funcións do Campus
de Ourense, estando como padriño de promoción o profesor do centro
Manuel Vilares. “O voso papel é ser enxeñeiras e enxeñeiros
informáticos e traballar para poder crear os mellores e máis
grandes sistemas informáticos”, díxolles aos futuros profesionais
o director da escola, Francisco Javier Rodríguez, convidándoos a
seguir formándose durante toda a súa vida profesional, pois son
moitas as evolucións e as transformación ás que se somete a
sociedade dixital, e ás que somete (tamén) aos restantes ámbitos
da nosa vida cotiá. Rodríguez tamén lles lembrou os bos agoiros
profesionais que os acompañarán no seu tránsito ao mercado
profesional. “Saíde aí fóra e demostrade o que valedes e non
esquezades que nesta, a vosa casa, sempre seredes benvidos”,
afirmou.
O
segundo dos actos foi o da Facultade de Historia, no Edificio de
Ferro. Tamén presidido por Virxilio Rodríguez, a nova promoción
estivo apadriñada polos docentes do centro Susana Reboreda e
Francisco Javier Pérez Rodríguez.