Entrégase o Premio ViaGalicia 2019, que vén con 150.000 euros de financiamento
venres, 1 de marzo do 2019
- Juan González Pérez, alcalde de Nigrán; o delegado de Estado en Zona Franca de Vigo, David Regades; Bibiana Rodiño, directora xeral de BETA Implants, e a directora de GAIN, Patricia Argerey.
Hoxe
foi un día relevante para a edición 2019 da aceleradora ViaGalicia,
posta en marcha pola Zona Franca de Vigo e máis a Xunta. En detalle,
entregouse ao abeiro da dita iniciativa de impulso empresarial e
innovador, por primeira vez, o
Premio ViaGalicia 2019, dotado con 150.000 euros de financiamento.
O galardón foi dar a BETA
Implants, nova firma innovadora adicada ao deseño e produción a
medida de implantes para animais. O recoñecemento foille entregado á
dita startup de mans do delegado de Estado na Zona Franca de
Vigo, David Regades, e a directora de Axencia Galega de Innovación
(GAIN), Patricia Argerey.
O
comité técnico encargado de seleccionar o proxecto gañador entre
as máis de medio centenar de firmas presentadas á primeira edición
deste recoñecemento salientou “a evolución do modelo de negocio
de BETA Implants desde a súa participación na aceleradora, a súa
consolidación no mercado, o valor engadido e innovación que achega
ao sector e a creación de emprego de calidade (cualificado e de
carácter indefinido)”.
Como
dixemos, este recoñecemento dotará ao proxecto de 150.000 euros de
financiamento, procedentes de XesGalicia e Vigo Activo, para apoiar
os seus plans de afianzamento e medre internacional.
Durante
o acto de hoxe, Regades sinalou que “BETA Implants é o exemplo
perfecto de empresa produtiva que ViaGalicia quere seguir apoiando,
con proxectos innovadores con capacidade para crear emprego para
Galicia e de manterse no tempo a través de modelos de negocio
sólidos”.
Pola
súa banda, a directora de GAIN, Patricia Argerey, recalcou “o
carácter innovador da empresa gañadora”, así como do resto de
empresas aceleradas na quinta edición de ViaGalicia, “que
contribúen a mellorar a calidade de vida da cidadanía galega
presente e futura”, salientou.
A
entrega deste premio, que recibiu Bibiana Rodiño, directora xeral
de BETA Implants, celebrouse durante a clausura do Investors Day,
xornada na que participaron un centenar de investidores (business
angels, consultores, directivos de banca e axentes doutras
aceleradoras) coñecendo as oportunidades de negocio das startups
aceleradas nesta última edición de ViaGalicia, todas elas, en maior
ou menor medida, relacionadas coas novas Tecnoloxías da Información
e a Comunicación (as TIC).
Con
vistas a conceder o dito galardón, ViaGalicia avaliou as cifras dos
proxectos presentados a esta convocatoria, salientando a creación de
máis de 60 empresas, das cales o 80% continúan hoxe activas. “Todas
elas”, explica a Zona Franca, “facturaron máis de cinco millóns
de euros e xeraron máis de 240 novos postos de traballo cualificado,
dos que o 83% son empregos indefinidos”. En total, os proxectos
acelerados en ViaGalicia conseguiron captar 19 millóns de euros de
financiamento, da que o 52% é de orixe privada.