En marcha unha universidade en liña para axudar aos xornalistas no camiño das 2.0

Se onte falabamos nesta mesma web da posta en marcha dun encontro na Illa de San Simón para atopar novos vieiros de traballo, eficaces e diferenciadores, para os xornalistas na nova Rede (o evento #NeThinking) agora toca falar dunha cuestión que vai por semellantes camiños. Trataríase do desenvolvemento dun campus virtual para comunicadores, un espazo de traballo e formación continua, non presencial, que servise para non deixar ren das posibilidades xornalísticas e laborais da Rede 2.0 por rastrexar. O proxecto, como indica estes días GaliciaHoxe, vén da man da FAPE, a Federación de Asociacións de Xornalistas de España.
Por certo que a iniciativa está en marcha e operativa dende onte, á vista de quen queira vela e empregala como unha plataforma de formación de redactores e de outros profesionais do sector, achegando máis ou menos propio que un campus de nova feitura: cursos, bolsas, masters (en xornalismo dixital, 2.0, comunicación corporativa, etc). En total, son máis de 40 iniciativas de ensinanza ás que dá acubillo, constituíndose case con toda probabilidade como a primeira plataforma destas características que, de xeito específico, se centra en achegar recursos formativos á devandita profesión. O novo portal é froito dun traballo conxunto entre a FAPE e a empresa consultora Editrain.