En marcha unha campaña para salvar ao activista que descubriu o alcance da ciberespionaxe dos EE UU
venres, 14 de xuño do 2013
O Goberno dos Estados
Unidos considera non só que é lícito ter acceso á información
privada dos internautas, senón tamén perseguir a aqueles que saquen
á luz os seus intereses e das corporacións que moven os seus fíos.
É o caso do cidadán norteamericano Edward Snowden, responsábel de
ter descuberto o programa de ciberespionaxe do seu país e ao abeiro
do cal, sostén, as autoridades estiveron a ler e gravar unha boa
parte das nosas chamadas, correos e mensaxes de Skype e Facebook. E
todo durante anos. O programa en cuestión chámase PRISM e está no
punto de mira dunha
nova campaña na Rede, multitudinaria, para apoiar a Snowden e
enviar unha mensaxe esixindo “que o traten coma ao ao
valente denunciante que é, e que a man dura aplíquese contra o
PRISM e non contra el”.
Segundo informa a
plataforma de activistas Avaaz, que é de quen parte esta iniciativa
a prol de Snowden, o programa PRISM é sinistro: “Outorga
ao Goberno de Estados Unidos acceso ilimitado a todos
os nosos correos persoais e ás nosas contas de Google, Youtube,
Facebook, Skype, Hotmail, Yahoo! e moito máis; están
a rexistrar millóns das nosas mensaxes cada mes e a CIA pode
utilizar esta información (agora ou no futuro) para procesarnos,
castigarnos, ou extorsionarnos a nós ou aos nosos familiares e
amigos”. Segundo engade a plataforma, Edward Snowden ficou
“arrepiado ante o programa PRISM”, ao que considera “unha
violación masiva e sen precedentes da nosa privacidade”. Deste
xeito decidiu copiar gran parte dos arquivos que coñecía e envialos
ao xornal The Guardian para que os publicasen, e logo escapou a Hong
Kong. A súa actividade, por unha banda, descubriu os intereses
ocultos do dito programa pero, por outra banda, puxo en marcha un
proceso imparábel de descubrimento de programas espías irmáns,
análogos, en países como Canadá, Reino Unido ou Australia. Neste
intre, Edward atópase en Hong Kong, agardando a ser detido. Segundo
engaden os activistas, “unha campaña de solidariedade
global pode salvalo de ser extraditado a EE.UU., e pode impulsar a
outros países a achegarlle acubillo”.