En marcha un hotel intelixente e centrado nas nosas letras na zona vella de Santiago
martes, 19 de novembro do 2013
A zona vella de
Compostela, os que viven ou traballan nesa zona sábeno ben, é un
fervedoiro de novas iniciativas hostaleiras e gastronómicas de
vangarda. Algunhas delas emprazadas até en espazos que ben poderían
ser considerados como baluartes da máis longa tradición local, como
é o caso da Praza de Abastos e a súa contorna. Precisamente preto
de Abastos é onde se rehabilitou os meses pasados un caserón do
século XVI, con fachada de Clemente Fernández e habitado no seu
tempo polo escritor e intelectual galego Manuel Murguía, co fin de
dar acubillo ao Smart Boutique Hotel Literario San Bieito, un hotel
urbano cualificado polos seus responsábeis como “tematizado
arredor das nosas letras amais de intelixente”.
O de intelixente non é
só por achegar servizos de conexión á Rede, cousa que ofrecen hoxe
en día tódolos hoteis, senón por albergar no seu seo, entre outras
cousas, un
laboratorio de ideas e tecnoloxías aplicadas e con feitura de
hardware e software, “integrando produtos e servizos dirixidos
a xerar novas experiencias aos hóspedes”.
Segundo fan saber os
promotores deste novo establecemento, o Smart Boutique Hotel San
Bieito é unha iniciativa mixta, que combina servizos de hotel
boutique de tipo urbano, cousas que van do aloxamento, almorzo
e refrixerios a servizos de comunicación e tecnoloxías de libre
disposición as 24 horas do día. “A nosa”, engaden, “é unha
achega onde a simplificación e a automatización son claves no
proceso de construción dunha proposta de valor cara aos seus
usuarios, á vez que a xestión do coñecemento cultural, en especial
a literatura, é o eixo temático da actividade”.
O establecemento, como
dixemos, está emprazado no centro monumental de Santiago de
Compostela, nunha casa do século XVI, cuxa fachada e arquitectura
atribúense a Clemente Fernández Sarela. A firma ESM e Asociados,
consultoría especializada no ámbito do turismo, a hostalaría e a
restauración, asesorou á promotora no proceso de deseño do modelo
de negocio e o desenvolvemento de produtos e servizos. O
establecemento ten espazos de seu en Google
Plus e Facebook,
dándose a coñecer como un portal ao coñecemento e, máis polo
miúdo, á longa tradición da nosa cultura literaria.