En marcha o servizo Luartube para conmemorar os 1.000 programas de Luar
xoves, 12 de novembro do 2015
Como lembraremos, o
mes pasado o xa histórico programa Luar da TVG celebrou un
feito que o fai aínda máis histórico: ter acadado xa os 1.000
programas en antena. Pois ben, os festexos tamén tiveron unha
vertente tecnolóxica, posto
que se acompañaron da posta en marcha de Luartube, o arquivo
dixital específico sobre o programa que está a guindar á Internet,
para os seareiros, os vídeos máis salientábeis do programa. O
servizo Luartube, no que
paseniño (pero sen pausa) vanse pendurando anacos referenciais do
discorrer de Luar (por exemplo Gayoso rapeando con Antón Reixa, ou
os ex xogadores do Deportivo Fran e José Ramón cantando cos
Diplomáticos, entre outras xoias a rescatar), artéllase en cinco
seccións que funcionan a xeito de pólas principais: Música Galega,
Humor, Artistas de Fóra, Variedades e Momentos.
Segundo comentan os responsábeis do programa, a
recuperación e dixitalización destes vídeos “é un traballo
enciclopédico” do que aínda que podemos agardar unha chea de
sorpresas (de feito aínda fica pendente moito material por revisar).
A xuízo do equipo que está detrás de Luar, o interese xerado na
Rede pola canle audiovisual acabada de pór en marcha demostra ás
claras que o programa presentado por Gayoso, logo dos seus 23 anos de
vida, aínda ten moito que dicir.