En marcha no Campus de Ourense o grupo de investigación Aerolab
luns, 8 de xaneiro do 2024
Baixo o nome de Aerolab
(Aerospace & Transportation Systems Laboratory) constituíuse
en datas recentes un novo grupo de investigación no Campus de
Ourense (Universidade de Vigo). Aerolab púxose en marca coa
finalidade de “converterse nun referente no ámbito da enxeñaría
do transporte, con especial énfase nos sistemas aéreos”, explicou
o seu investigador principal, Higinio González. As principais liñas
de traballo de Aerolab serán a mobilidade (destacando o aéreo) e a
xestión de infraestruturas de transporte, aplicando tecnoloxías
como sistemas aéreos non tripulados, sistemas de navegación
satélite, satélites de observación terrestre, sistema de
información xeográfica, visión por computador, LiDAR, algoritmos
de control e optimización e xeoinformación e Intelixencia
Artificial.
Segundo explicaron os seus responsábeis, Aerolab
é un grupo multidisciplinar formado por persoal investigador de
diferentes eidos de coñecemento (como a física, a enxeñaría
aeroespacial, a informática e enxeñaría de sistemas) pertencentes
ao Instituto de Física e Ciencias Aeroespaciais da Universidade de
Vigo. Está formado por oito membros, estando ademais de Higinio
González, Fernando Veiga, Eduardo Balvís, Gonzalo Durán, Enrique
Aldao, Gabriel Fontenla, Eduardo Ríos e Raquel Ortega. Estes membros
participan en cinco proxectos de investigación financiados con máis
de 800.000 euros pola Axencia Estatal de Investigación e o programa
europeo Horizon Europe. Entre estes proxectos están os de Modelo
de inspección e información ferroviaria (RIIM); o de
Dixitalización
do espazo aéreo e mariño para o despregue de sistemas aéreos non
tripulados aplicados ao mantemento de parques eólicos offshore
e o titulado Sustainability
and resilience for infrastructure and logistics networks.
Para o desenvolvemento do seu traballo, explica
Higinio González, profesor da Escola de Enxeñaría Aeronáutica e
do Espazo da UVigo, o grupo dispón de instalacións no Campus de
Ourense, nas que se poden facer, por exemplo, ensaios de sistemas de
inspección ferroviaria ou ensaios con aeronaves non tripuladas, e de
servidores de cálculo e almacenamento masivo de datos. Sobre a posta
en marcha deste novo grupo o seu responsábel sinala que “buscamos
a excelencia na investigación, sen perder a conexión coa contorna
socioeconómica da nosa rexión e a necesidade de trasladar os nosos
resultados á industria”.