En marcha e con obxectivos renovados a segunda edición da Factoría da Innovación de Vigo
martes, 15 de xullo do 2014
Hai Factoría
de Innovación de Vigo para rato. Así o confirmaron este martes
a Escola de Organización Industrial, o Consorcio da Zona Franca e a
Universidade de Vigo, responsábeis da posta en marcha da segunda
edición da Factoría (unha iniciativa que conta co co-financiamento
do Fondo Europeo de Desenvolvemento Rexional). O obxectivo é subir
un novo chanzo na escada do apoio ao emprendemento e a integración
de iniciativas innovadoras nas PEME do sur de Galicia. “Esta nova
convocatoria”, sinalaron, “dará continuidade ao éxito obtido na
edición anterior, na que participaron máis de 750 empresas e
impartíronse 600 horas de consultoría, que permitiron que 30
compañías de diferentes sectores puidesen deseñar e pór en marcha
un proxecto innovador”.
A nova etapa da Factoría,
que se presentou hoxe pero porase en marcha en setembro, inclúe
entre outras cousas un Plan de Consultoría Individualizado, que é
un programa no que poderán participar dúas ducias de empresas e
abrangue sesións de traballo individuais e colectivas sobre
innovación e xeitos de converter ideas creatividades e realidade,
adestramento e asesoramento en conceptos como competitividade ou
fórmulas para situar a nosa empresa nun lugar visíbel (física e
virtualmente). Por outra banda, entre os meses de outubro de 2014 e
marzo de 2015 organizaranse 14 actividades en aberto, desde
seminarios a exposicións de tendencias ou obradoiros en vivo,
dirixidas a avaliar os mecanismos que existen para acadar que as
compañías sexan verdadeiramente innovadoras e sustentábeis.
O período de inscrición
para participar no Plan de Consultoría Individualizado comezará a
mediados do mes de xullo e prolongarase até despois do verán. As
empresas interesadas deberán realizar a súa solicitude a través da
web da Factoría de Innovación de Vigo, onde se habilitará un
espazo específico para este fin.