En marcha Lugomove, unha web para desenvolvedores e destinatarios de accións culturais en toda a provincia
xoves, 16 de maio do 2013
Amais da presentación do
seu Congreso da Cultura Dixital, da
que avanzamos onte unha serie de detalles, a Deputación de Lugo
estivo esta semana atarefada na posta en longo doutra iniciativa TIC.
Máis concretamente, o seu espazo en liña cultural, a xeito de
axenda dixital, un espazo informativo para dar conta de canta
actividade de lecer se celebre na provincia e achegar un escenario
común de promoción para artistas e colectivos da provincia. O
espazo en liña chámase Lugomove e foi presentado
este mércores, da man da Vicepresidencia Primeira da Deputación,
departamento responsábel da súa posta en marcha.
A web, artellada en
diferentes categorías (por vilas, cidades e bisbarras, e tamén por
tipo de actividade: teatro, cinema, circo, danza, exposicións,
música, festivais etc), é unha web para espectadores e para
actores, artistas, músicos e demais. De feito, permite aos
interesados integrar as súas
propias iniciativas na axenda. Isto
materialízase no apartado de colaboradores, onde concellos,
asociacións, grupos, compañías, creadores
e todo tipo de entidades poden dar a coñecer as súas actividades de
lecer dentro da provincia de Lugo a través desta axenda cultural.
O
delegado de Cultura e Turismo da Deputación de Lugo, o nacionalista
Mario Outeiro, foi o
encargado de presentar esta
semana o devandito portal,
ao que cualificou de “ferramenta cultural
que serve
de nexo de unión entre todos aqueles axentes que son dinamizadores
da cultura
na provincia de Lugo”,
ao que engadiu:
“É unha aposta pola
promoción cultural desde a base, agora que a Xunta de Galiza desde o
AGADIC está a reducir drasticamente o seu apoio ao sector”.
Mario
Outeiro fixo saber,
ao mesmo tempo que se abría a páxina web para uso público e se
amosaba
aos medios, que LugoMove “nace
coa pretensión de ser un espazo de referencia sobre os recursos
culturais e de lecer existentes na provincia de Lugo, un portal no
que se reúne toda a oferta de actividades da provincia, onde o
usuario poderá acceder a toda a información sobre as diferentes
actividades (concertos, exposicións, obras de teatro, festivais,
espectáculos de danza, circo…) que se organizan en cada comarca.
Ao mesmo tempo que LugoMove se presenta como un punto de referencia
para o usuario a través da súa axenda de programación, tamén
pretende ser unha ferramenta de difusión a través do apartado de
colaboradores. Desta maneira, os Concellos, asociacións, grupos,
compañías e todo tipo de entidades poden dar a coñecer as súas
actividades de lecer dentro da provincia de Lugo a través desta
axenda cultural”.