En 2014 incautáronse artigos valorados en máis de 17 millóns por delitos contra a propiedade intelectual
xoves, 4 de xuño do 2015
Os Ministerios de
Interior e de Educación publicaron
esta semana o seu Balance 2014 das actividades contra a vulneración
dos dereitos de propiedade intelectual. Ou sexa, o informe
habitual (e anual) das actuacións das forzas policiais desenvolvidas
para protexer os ditos dereitos, sendo as novas tecnoloxías un dos
principais eidos de traballo das autoridades. Na investigación
sinálase, entre outras cousas, que as Forzas e Corpos de Seguridade
desenvolveron o ano pasado 532 intervencións e detiveron ou
imputaron a 417 persoas por infraccións. Asemade, incautaron 134.993
obxectos valorados en máis de 17 millóns de euros, tres cuartas
partes dos cales eran obxectos dixitais.
Este informe recolle o
total das intervencións policiais realizadas tanto polas Forzas e
Corpos de Seguridade do Estado (Policía Nacional e Garda Civil) como
polos Corpos de Policía Local que facilitan datos ao Sistema
Estatístico de Criminalidade.
As cifras que se achegan,
malia ser rechamantes, son menores cás doutros anos. Segundo se
apunta no informe, “os feitos ilícitos coñecidos que vulneran
dereitos de propiedade intelectual seguen a tendencia descendente dos
últimos anos e diminúen un 2,4%”. Polo que respecta ao volume de
obxectos intervidos rexistra unha caída do 43,9% e as detencións ou
imputacións efectuadas descenden un 1,4%.
A distribución
territorial da delincuencia que afecta á propiedade intelectual
concéntrase sobre todo en Madrid, Andalucía, Cataluña, e Comunitat
Valenciana.
Dentro do conxunto dos
efectos intervidos o máis cuantioso é o sector que se refire aos
soportes de almacenamento dixital (CD/ DVD/ANÁLOGOS), co 71,2% do
total.
Na loita contra a
vulneración dos dereitos en Internet, a investigación lembra que a
Comisión de Propiedade Intelectual (CPI) dispuxo en 2012 unha
Sección Segunda competente no procedemento administrativo-xudicial
de salvagarda dos devanditos dereitos na Rede. Desde o inicio da súa
actividade e até a data de 31 de maio de 2015, presentáronse ante a
Sección Segunda da CPI 442 solicitudes, das cales se resolveron
expresamente 413 (o 93,43% das solicitudes presentadas). Dentro das
resolucións expresas, infórmase que das 238 páxinas afectadas ou
requiridas (entre elas, 71 webs de ligazóns), 233 retiraron até o
de agora os contidos identificados pola CPI que fornecían “de
xeito ilícito”. Un total de 31 páxinas cesaron por completo a súa
actividade.