Empresas mexicanas visitan a sede de Redegal en Ourense
xoves, 23 de novembro do 2017
- Os empresarios mexicanos reunidos co equipo de Redegal e coa Deputación de Ourense
Redegal,
axencia galega de mercadotecnia dixital e ecommerce, acolleu
onte a segunda xornada da Misión Comercial Inversa que organiza o
Clúster TIC Galicia, unha iniciativa patrocinada pola Xunta (a
través do IGAPE) e que busca fortalecer as relacións comerciais e
de cooperación con empresas mexicanas para que dean conta do
potencial e das posibilidades do noso tecido empresarial e do noso
pulo innovador. Durante a xornada, unha delegación mexicana (os
responsábeis de Dentix México, Deportes Martí, West Mex, Piagui,
Agencia Digital, Medio Tiempo, Desarrolladora en Proyectos de
Seguridad Electrónica IT, Ubiquity brands e ABC XYZ Espacios de
inversión) visitou as instalacións de Redegal en Ourense, onde os
seus integrantes tiveron oportunidade de coñecer as principais liñas
de traballo da firma galega e mailo seu equipo de traballadores.
Cómpre
lembrar que Redegal mantén estreitas canles de colaboración co país
americano. De feito, en 2014 inaugurou a súa oficina en Cidade de
México, onde conta xa con números clientes de diversos sectores e
representa o 26% da facturación. En palabras de Jorge Vázquez,
director executivo (CEO) de Redegal, “México foi noso primeiro
paso para a internacionalización e é un pracer poder recibir aos
nosos partners mexicanos na nosa sede galega”.
O
programa da visita, que se prolongará ata o venres, inclúe unha
axenda de encontros con outras empresas punteiras de Galicia. Durante
a xornada deste xoves, os participantes volverán de novo ás
oficinas de Redegal na sesión de tarde.
Na
xornada de onte, a delegación mexicana tamén tivo ocasión de
coñecer o casco histórico de Ourense e de visitar a sede da
Deputación de Ourense, onde se reuniron co presidente Manuel Baltar.