EmpregaTIC mellorou as posibilidades de inserción laboral de 15 mozas e mozos de Lugo
mércores, 8 de marzo do 2017
O Concello
de Lugo vén de facer reconto do xerado a través do obradoiro
municipal EmpregaTIC, unha actividade cuxa presente edición
arrincou en setembro co obxectivo de achegar aos desempregados locais
medio ano de formación especializada no eido das novas tecnoloxías
da información. Segundo fixo saber a concelleira de Economía e
Desenvolvemento Económico, Ana Prieto, o obradoiro cumpriu “un
obxectivo duplo”, por unha banda mellorar as posibilidades de
inserción laboral dos 15 mozos e mozas participantes nun xacemento
de emprego como son as TIC, “sector que no 2013 deu traballo a
preto de 1,6 millóns de persoas en España de forma directa e
indirecta”, e, por outra, poñer en valor o patrimonio documental,
natural e histórico de Lugo.
O balance de EmpregaTIC, artellado nas
especializades de xestión de mercadotecnia e desenvolvemento de
produtos multimedia interactivos, levouse a cabo en presenza do
alumnado participante. Segundo lembrou a edil, a actividade comezou o
pasado 29 de setembro no Centro de Empresas e Innovación do Concello
de Lugo (CEI-Nodus) e estivo financiado pola Xunta de Galicia.
“Grazas a el”, sinalou Prieto, “púxose en
valor e difundiuse o patrimonio documental e histórico do municipio,
dixitalizado e recuperado por obradoiros anteriores como Urbs
Lucus, Arqueo Lucus ou A Memoria da Cidade”.
Para acadar o devandito obxectivo de posta en
valor do patrimonio, as dúas devanditas especialidades do obradoiro
traballaron de xeito conxunto para desenvolver contido e material
gráfico. Máis polo miúdo, a especialidade de mercadotecnia centrou
os seus esforzos na análise de datos e a investigación sobre o uso
das ferramentas de comunicación social, “para chegar ao seu
público obxectivo”. Así, os participantes neste módulo
desenvolveron estudos da competencia e do mercado para completar un
plan de mercadotecnia online e offline con propostas de
promoción do traballo realizado. “Para lograr todo isto”, dixo a
edil, “empregáronse fontes de información primarias e
secundarias, e ferramentas de seguimento que permitiron levar a cabo
unha análise cuantitativa e cualitativa das conversas en redes
sociais por parte dos concellos cos seus cidadáns”. Polo que
respecta á outra especialidade, a de desenvolvemento de produtos
multimedia interactivos, focalizou os seus esforzos na elaboración
dunha aplicación web con planos e imaxes dos séculos XVIII, XIX e
XX. A app será accesíbel, unha vez que remate o obradoiro, a
través da web municipal.
A maiores de todo o devandito, os participantes no
obradoiro organizaron un evento que o Concello cualificou de
“pioneiro na cidade de Lugo”. Este evento, sinalou o Goberno
local, servirá para expoñer todo o traballo de dixitalización dos
obradoiros ata a actualidade, consistindo nun congreso previsto para
o 11 de marzo. Será “o broche de ouro destes meses de traballo”,
en palabras do Concello, que salientou a importancia de teren
adquirido os rapaces “coñecementos de organización de eventos,
protocolo, redes sociais, mercadotecnia de contidos, xestión de CMS,
plans de comunicación e medios, coñecementos de SEO e mercadotecnia
dixital, así como elaboración de contidos de publicidade e de
promoción”.