Elogia, homologada por Red.es para impulsar o ecommerce entre as PEME

A oficina de Elogia en Vigo, o día da súa presentación oficial

A empresa de mercadotecnia en liña Elogia, que ten sede en Vigo e conta no seu posto de mando cos galegos Rubén Bastón e Rubén López Ferreiro, anunciou que vén de ser seleccionada pola sociedade público-empresarial Red.es para desenvolver unha das súas grandes estratexias para o ano vindeiro. Trátase do programa de asesoramento en comercio electrónico para pequenas e medianas empresas, un programa que abrangue un orzamento de 10 millóns de euros en subvencións a fondo perdido, dos cales cada proxecto pode beneficiarse de até 30.000 euros. Segundo nos lembra Elogia, Red.es prevé adxudicar máis de 340 proxectos en toda España.
Para o galego Rubén Ferreiro, director executivo de Elogia, “esta homologación corrobora até niveis de organismo público a especialización da empresa en marketing e comercio electrónico; para nós é un orgullo e unha gran responsabilidade ser unha das poucas axencias que acadou a devandita distinción nunha contorna na que a gran maioría son asociacións de empresas ou unións temporais de compañías, creadas para lograr a homologación de Red.es”, subliña. Segundo engade, as PEME interesadas en participar neste fomento do comercio electrónico deben entregar a súa solicitude antes de 7 de outubro de 2013 a través da web Red.es. O único requisito é que teñan web xa publicada e vendan ou teñan previsto vender a través de Internet, ademais de ter a sede social en España, pero en calquera comunidade que non sexa Madrid, Catalunya, Euskadi ou Balears. O programa de mentoring de Red.es divídese en dúas fases: unha de diagnóstico e asesoramento e outra de implantación das melloras identificadas na consultoría.