Elogia celebra hoxe os seus 15 anos de impulso á mercadotecnia dixital
xoves, 2 de outubro do 2014
- Rubén Ferreiro, da axencia Elogia
Hoxe é
un día de celebración para Elogia,
empresa con ampla participación galega, non só por
ter unha das súas sedes principais en Vigo, senón tamén por
contar entre os seus responsábeis directos cos galegos Rubén
Bastón e Rubén
Ferreiro. E falamos de día de celebración porque hoxe ás 20.00
horas, a empresa de publicidade en liña conmemora o seu quince
aniversario “cunha festa do sector da mercadotecnica en liña en
Barcelona”. Este mércores, para facernos unha idea do alcance da
cita, xa había arredor de 250 profesionais confirmados, e a cifra ía
subindo. Amais da celebración propiamente dita dos tres lustros de
actividade empresarial, presentarase a nova marca do grupo Elogia.
O evento desenvolverase
na sala Sala InGracia de Barcelona. Á convocatoria, que se agarda
sexa “unha gran velada de networking dentro do sector da
mercadotecnia dixital”, en palabras de Rubén Ferreiro, acudirán
clientes actuais e antigos da axencia, empregados actuais e antigos,
colaboradores, provedores, profesionais relevantes do sector e mesmo
competidores. Abrirase cun percorrido histórico pola evolución da
compañía (dende o seu nacemento como a primeira plataforma estatal
de permission email marketing en 1999, baixo o nome de
Consupermiso, pasando polo seu espallamento e afianzamento en España,
Portugal ou México ou
a fusión con empresas do sector tan salientábeis como
GaliciaBanner, da que falamos en Código Cero alá polo 2007).
Segundo engade Rubén
Ferreiro avanzando a axenda dos actos de celebración, ao longo desta
presentarase un vídeo gravado con persoas que foron importantes na
historia de Elogia. A proxección de vídeo, engade, será sen dúbida
“un intre moi emotivo”, amais dun “agradecemento a todos
aqueles que impulsaron e impulsan a empresa cara a un futuro ben
asentado e de alicerces fortes”. Ferreiro tamén sinala que outros
dos intres relevantes da velada será sen dúbida a presentación en
sociedade da nova marca paraugas do holding empresarial, “que
até agora sempre traballou baixo a marca Eloxia Group”. Así,
desde hoxe desvelarase a nova marca do grupo que dará acubillo
ás distintas iniciativas empresariais da corporación.